Ingeniero ta hala atencion pa e prijs di baca flaco cu ta duna na tereno, edificio di ex edificio di Duana

No tin nada pa stroba Minister di Obranan Publico y Infrastructura pa cambia un edificio y tereno publico cu un otro, pa asina e compania Bohama por traha e edificio nobo di Duana na Barcadera. Es mas, e Minister mester traha un decreto nacional pa e transferencia. Kizas pa compronde, Riu Palace a haya e tereno y edificio di ex Aruba Palm Beach Hotel (conoci antes como Sheraton) pa medio di un decreto ministerial.

Den otro palabra, tanten cu e leynan di erfpacht, cu ta regla tereno publico ta keda anticua, Gobierno tin libertad pa haci cu tereno publico segun e ta considera necesario.

Pa Ing. Ghisberto Figaroa, e cambio di tereno na LG Smith Baolevard 84 pa un edificio pa Duana na Barcadera ta algo cu no por splica. El a pone su opinion riba media social y durante un entrevista cu Bon Dia Aruba, el a bisa cu simplemente e cambio of ‘swap’ manera Prome Minister Evelyn Wever Croes a yam’e, no ta logico. Segun Figaroa, el a compara balor di terenonan banda di La Linda den Caya Grandi y a constata cu e prijs ta alrededor di 5000 florin pa meter cuadra. Como tal, el a bisa cu si hasta tuma e balor di e tereno di e edificio bieu di Duana na LG Smith Baolevard 84 na 3000 of 4000, e ta nifica cu na tereno so, e balor ta entre 12 a 16 miyon florin. Esey ta sin conta e balor di edificio cu berdad ta decadencia, pero realidad ta cu e ta consisti di un structura di hero cu a keda cubri. Pues “e edificio tin un balor monetario hopi halto y ta patrimonio di Pais Aruba,” Figaroa a comenta. “Nos ta papia aki di ‘prime real estate.’”

Ta cambia tereno di balor pa edificio inferior

Pa tal motibo mes e arkitecto ta haya hopi cuestionabel cu awor kier cambia un patrimonio di pais Aruba cu tin un balor multimiyonario pa un edificio di cinco miyon cu Bohama awor lo traha riba tereno di Gobierno pa Gobierno. Ta trata di un edificio dilanti di edificio di DTI na Barcadera. “Y corda cu aki ta papia di un inversion di cinco miyon pa tur cos, cu ta inclui infrastructura, tereno pa parkeer y otro.” Den concepto di Figaroa cu tabata envolvi den proyectonan di Gobierno, mester tene cuenta cu e cinco miyon destina pa Bohama no ta inclui e trabao di e arkitecto, cu mester ta calcula rond di mey miyon florin cu ta bin acerca y meter tuma otro miyon pa infrastructura, por ehempel e gasto di parkeerplaats y otro cu si ta inclui den e suma di 5 miyon.

“Aruba lo haya otro edificio barata traha. Lo no tin e fondonan necesario pa haci esaki un edificio sostenibel manera semper Gobierno lo kier, pasobra nunca ta aloca e fondonan necesario pa logra esey. Aruba ta keda cu e custumber di traha edificionan barata cu despues ta duna problema.” Segun e ingeniero, esaki ta un custumber caba na Aruba. Esta cu ora cu ta entrega un diseño, mesora mester laga partinan afo cu ta kibra henter e integridad di locual e arkitecto a presenta. Consecuentemente, hopi parti esencial di un edificio cu e ingeniero a tene cuenta cune no ta keda construi pa motibo cu e presupuesto ta limita.

Prijsvraag

Locual ta haci e proyecto mas yamativo, ta cu e tereno na Barcadera a keda identifica pa e edificio nobo di Duana durante Gobernacion di Mike Eman II. E tempo ey, Ing. Figaroa hunto cu como otro 14 compania di arkitecto a participa na un asina yama prijsvraag, pa entrega un diseño pa e edificio na Barcadera. Tur a paga 1500 florin pa e bestek. Pero e compania di Figaroa no a gana e diseño, sino un otro. Pero na 2016, for di dos fuente a compronde cu a dicidi pa no usa e diseño di e ganado,sino di esun cu a bin na di dos luga cu tabata entrega pa PMEC Consultant, bao di e argumento cu e compania aki lo por a traha e edificio pa menos di 10 miyon florin. E intencion tabata pa bende edificio di Duana na LG Smith Blvd 84 pa 10 miyon y cu e placa aki traha e edificio nobo.

Pero awor e balor a baha 5 miyon (5.5 miyon cu ta inclui e trabao di ingenieria). “Ta bisto cu no tin interes pa mantene obranan arkitectonico riba e isla aki ni pa conserva historia,” Figaroa a bisa riba su pagina di Facebook. Y el a ripiti su ponencia cu e suma di 5 miyon (5.5 cu gasto di ingenieria) ta simplemente un insulto pa Aruba, mirando cu ta bay regala Bohama un propiedad di un balor mucho mas halto, pa a cambio haya un edificio limita na calidad inferior. “Lo ta interesante pa mira e balor di mercado den e evaluacion (taxatie) oficial y ken a traha esaki,” Figaroa a remarca.

Potencial pa otro haci ganashi enorme

Bon Dia Aruba a haci comparacion cu un edificio na waf di Aruba cu ta bende condominio. Ex Marazul tin un espacio di casi 7200 meter cuadra y tin un edificio construi cu ta di 7 piso, y tin 110 unidad. E unidad mas barata ta bay pa 225 mil dollar ( tin unidadnan cu ta mucho mas caro, cu mas camber y cu bista sin obstruccion) Un calculacion conservativo ta mustra cu e proyecto en cuestion tin e potencial di produci Si e espacio di LG Smith Blvd ta 4000 meter cuadra, por pone un edificio cu un poco mas cu mita cu ex MarAzul. Den otro palabra, e potencial pa haci un ganashi cuantioso ta enorme. Si 110 unidad na 225 mil dollar (so) por produci casi 25 miyon florin, 55 unidad na e mesun balor, por produci un suma reserva di 12.5 miyon dollar. Y e costo di tereno ta unicamente 5 miyon florin.

Bon Dia Aruba a tuma contacto cu Bohama pa puntra con ta bay financia e construccion, ki diseño lo usa y ki tipo di edificio lo traha na Barcadera, pero a keda notifica cu e compania no tin comentario. Tambe tabata kier sa kico ta e intencion cu e edificio y tereno na LG Smith Blvd 84, pero no a haya reaccion.

Destaho publico of no

Locual Gobierno ta bay haci ta usa tereno di Pais Aruba como pago pa un edificio nobo. Di otro banda, experto huridico a splica Bon Dia Aruba cu transferencia di un tereno publico pa un entidad priva (Bohama) ta permiti pa un ley di erfpacht cu ta hopi anticua.

Consecuentemente e ley ta permiti Gobierno pa haci cambio of haci uso di terenonan publico basa riba un landsbesluit, un decreto nacional, sin cu mester bay Parlamento of hasta haya conseho di Raad van Advies. “E ta comparable cu nombracion di un empleado publico,” a splica Bon Dia Aruba. “Cambio di tereno por hasta cu un decreto ministerial unda no mester bay ni na Gobernador, manera tabata e caso cu Riu Palace. Pues, tanten cu ta keda traha cu un ley hopi bieu, ta keda cu e situacionnan aki cu ta hala atencion.”

Tampoco e ‘swap’ ta cay bao e Ley di Comptabilidad, algo cu otronan a bisa cu mester drenta den wega ya cu ta papia di un ‘vervreemding’ di un propiedad di hopi balor. Pero e hurista cu a consulta, esey ta conta unicamente si e cambio ta sosode cu un compania cu Gobierno ta lanta. Otro hurista no ta de acuerdo cu e ponencia aki y ta pa motibo ey mes cu den pasado ex lider di fraccion Sr. Marlon Sneek a haci pregunta na Gabinete Evelyn Wever Croes I riba e intencionnan aki, pero no a haya contesta riba su preguntanan. Es mas, hasta si ta haci cambio of un ‘swap,’ e tin un balor di 5 miyon florin, cu pa ley di Comptabilidad ta rekeri un destaho publico pa e proyecto na Barcadera.

Mester bisa cu tempo cu a traspasa e edificio y tereno di Hospital Dr. Horacio Oduber y tambe e tereno di refineria pa RDA, mester a bay Parlamento di Aruba pa haya aprobacion, pasobra esakinan a sosode pa medio di un landsverordening.

Segun Ing. Ghisberto Figaroa, mester tene cuenta tambe cu tin un edificio di ex DOW tambe para bashi, sin cu a haci algo pa mantene e edificio. E balor strategico sinembargo ta enorme y e ta interesa pa sa si e edificio ey tambe lo bay den un tipo di ‘swap’ den caso cu Gobierno mester di paga ‘den natura.’