ORANJESTAD – Pa CAFT e entrada presenta den presupuesto 2016, no ta un garantia suficiente pa reduci deficit riba financia publico. Un medida cu ta wordo papia di dje y cu a bira motibo di controversia -te hasta den seno di gobierno- tin di haber cu e introduccion di e ley di impuesto riba importacion, esta ABB. E punto cardinal tin di haber si lo bin mas medida pa atende cu e deficit aki. Esaki ta un incertidumbre cu gremio manera ATIA a yega di expresa. A base di un pregunta formula pa Bon Dia Aruba riba e punto aki, Prome Minister sr. Eman a bisa: “Locual nos ta haciendo ta purbando di tur forma pa por percura cu pa medio di austeridad den e gastonan di gobierno mas hopi cu ta posibel…” Gobierno ta spera cu e maneho aki lo resulta exitoso, pa evita cada bes yega cerca nos pueblo pa percura pa e sostenibilidad di financia publico pa medio di impuestonan.
Deficit
Esaki minister presidente a declara durante un conferencia di prensa, unda recientemente el a elabora riba e aprobacion den conseho di minister di e ahustacion di e “memorie van toelichting”. Den e documento di aclaracion y splicacion cu ta bay hunto cu presupuesto –segun e mandatario- a wordo considera e sugerencia Conseho Consultivo (Raad van Advies) di tuma e parti di CAFT, den nan conseho. E mandatario a bisa cu e organo aki a bisa den su evaluacion di presupuesto 2016 nan ta mira e reduccion di e deficit den nan calculacion di 9.3 na 2.9%. Mientras cu e ley mes ta bisa cu e mester ta na 2%. Premier Eman a indica cu nan mes a calcula e deficit na 2%. Segun gobierno, e cifra aki ta alcansabel a base entre otro di stimula economia, baha gasto y reforma importante den e fondo di pensioen. Na 2014 tabatin un deficit na 9.3%, esaki kiermen un suma di 444 miyon florin. El a bisa cu e deficit aki a wordo baha na 183 miyon na 2015; y den e presupuesto 2016 nan a reduci e deficit aki na mita, kiermen na 81 miyon florin.
Economia.
Pa CAFT e forma cu gobierno a calcula entradanan ta mucho optimista, ya cu un deficit ta locual ta e resultado di nan entrada, y nan ta kere cu entrada ta insuficiente pa atende cu e deficit aki. E entrada presenta ta depende hopi riba comportacion di nos economia y inversion haci durante 2016. Segun e prome mandatario nan ta poniendo hopi enfasis riba empuhe economico cu ta “traduci su mes den entrada adicional pa Gobierno”. Pero esaki ta susceptibel na diferente factornan cu nan mes no tin control riba dje, specialmente si nos tin turismo como nos pilar economico, y esaki ta un pildo cu CAFT no ta guli manda abou facilmente. Specialmente cu e entrada aki a wordo calcula a base di proyecto cu ta y lo wordo desaroya. Tambe e contribucion cu ya sea reapertura of desmantelacion di refineria lo trece pa nos economia. CAFT no ta mucho convenci di esaki, y p’esey nan ta kere cu e deficit lo ta mas grandi di loke gobierno a calcula si no bin cu medidanan concreto.
Medida y reduccion di gasto
Aunke gobierno ta haya cu e ahustacion cu nan ta bin haciendo entre otro den AZV via BAZV cu un 3,5%, ta un medida cu –segun Gobierno- durante 2016 lo tin su impacto. E lo ta mas grandi henter aña na 2016, mientras cu na 2015 tabata practicamente mita aña paso el a drenta na vigor na augustus ultimo.
Otro medida ta pa baha gasto pa medio di reduccion di personal den aparato gubernamental. Otro fase di e ley pa retiro boluntario, esta e areglo di VUT a wordo reactiva desde 1 di november te cu 31 di december di 2015. Segun nos prome mandatario, nan lo sigui cu un maneho basta stricto riba nan gastonan. E mandatario a señala cu nan filosofia ta di busca e recuperacion tambe di nos financia publico den e tipo di atencion aki, pa minimalisa impacto relaciona cu aumento di belasting of cualkier impuesto cu ta haci e bida di nos hendenan mas dificil. E ta un filosofia cu segun premier Eman a prevalece durante su dos gabinete compara cu e gabinete anterior na su gobierno.
