Gobierno di Aruba ta reanunda e negociacionnan cu Valero. Esaki Richard Arends ta bisa Bon Dia riba pregunta con leu e traspaso di e refineria pa Pais Aruba ta.
13 di mei minister Mike de Meza a bisa cu lo cumpra e refineria pa un suma simbolico di 1 florin. Banda di esaki lo tuma over e fondo cu 19 miyon florin destina pa limpiesa di e tereno. Siman pasa gobierno a firma entre otro e acuerdo final pe lease cu Citgo. Pero te ainda e refineria ta den man di Valero y no tin un acuerdo ainda cu gobierno di Aruba. No ta cla den cua tempo e partidonan lo keda cla y kico awor ainda ta e puntonan di negociacion.
Kico a wordo firma na Caracas
Riba nos preguntanan kico a wordo informa diabierna pasa despues den comunidad esaki a wordo cuestiona, Arends ta bisa cu a firma 5 acuerdo. E acuerdo principal ta e Definitive Participation Agreement cu gobierno a firma cu Citgo Petroleum Corporation. Pues e acuerdo no a keda firma cu e compania local, esta Citgo Aruba, segun e informacion aki duna pa Arends, cu ta e lidera e team di negociadonan. Tabatin basta comentario di hende cuestiona esaki despues den cierto prensa internacional tabata bisa cu a firma un acuerdo cu Citgo Aruba y no e compania madre na Merca.
E otro acuerdonan cu gobierno a firma na Caracas ta: Refinery Lease Agreement; Terminal Lease Agreement; Dispute Settlement Agreement; Terminal and Supply Service Agreement (e ultimo pa e mercado local).
MOU
Banda di esaki gobierno a firma un Joint Statement, referiendo na e Joint Statement di 2010 (firma pa minister di Exterior di Hulanda, Maxime Verhagen y e tempo ey Caciller Nicolás Maduro ) y tambe na e MOU di 2013 riba cooperacion economico (firma pa minister di Exterior di Hulanda Frans Timmermans y Canciller Jaua di Venezuela).
Arends ta confirma finalmente cu tambe a firma un MOU pa lanta un team pa investiga e aspectonan tecnico y huridico pe construccion di e tubo di gas. “E tubo ta bay core den e awanan teritorial y nos mester inventarisa e aspectonan di derecho internacional”, Arends ta splica.
