Gobierno ta purba di recupera terenonan otorga di forma ‘straño’

ORANJESTAD – Otro luna gobierno bin cu un maneho nobo riba tereno comercial y di vivienda otorga di forma habri y cu pa hopi aña no a conoce niun desaroyo. Minister di infrastructura, Otmar Oduber a dicidi den su maneho pone termino na e otorgamento di tereno di forma habri, y el a dicidi di bin cu un fase transitorio di un aña riba e terenonan cu a wordo entrega di e forma anterior.

Ayera e mandatario a laga sa cu entrante otro luna ta bira un aña cu gobierno a bin cu e maneho nobo aki. Na fin di mei venidero, Oduber lo duna un analisis riba e prome grupo di 300 hende cu a wordo otorga tereno for di añanan di decada 90, pa defini con a para cu e terenonan aki. El a premira cu e porcentahe di e hendenan cu a desaroya e tereno ta bay subi. Mientras cu otro luna nan ta bay saca esun di 2006 y 2007.

Pa loke ta tereno comercial, tambe nan a warda un proceso di un aña. Ta asina cu tur tereno cu a wordo otorga prome cu mei 2018, gobierno lo bay atende cu nan tambe. El a bisa cu durante e gobierno anterior, cantidad di tereno a wordo otorga sin cumpli cu e rekisitonan necesario ‘bou condicion straño.’ Actualmente nan ta atendiendo cu e terenonan aki cu a wordo otorga y cu ainda no a wordo desaroya. E terenonan aki, departamento di infrastructura y planificacion (DIP) ta recuperando bek pa gobierno, ya cu no a cumpli cu nan exigencianan, y gobierno ta atendiendo cu nan.

El a indica cu mayoria di tereno un 70 pa 80 porciento banda di Sasaki te Arashi a wordo otorga, caminda hopi hende a haya tereno bou condicion straño, y nan ta recuperando bek pa gobierno. Pero apenas un 20% di e tereno aki ainda ta habri, mientras e resto ‘tur a bay,’ el a bisa.

Segun Oduber, ‘bou di mi mandato niun tereno comercial no a wordo pasa ainda na Notario di esunnan cu a cumpli cu tur rekisitonan exigi’. Di e forma aki e kier reacciona contra e criticanan cu e ta dunando cantidad di tereno na su sponsornan politico.

Pa loke ta tereno pa vivienda, no tin suficiente kavel chikito. Mientras tereno di 800 meter cuadra, kavel di e tamaño ey nan tin disponibel, segun e mandatario. E ta mira cu e hendenan ta birando mas consciente, y nan ta interesa pa haya un pida di tereno mas chikito, pa asina evita di paga pa cura mas grandi sin mester. Tambe door di e porcentahe di 20% pa 30% cu bo mester tin pa construi. E porcentahe ey ta bay determina e finansa cu e persona mester tin pa construi su cas.

APFA a traha un rapport, cu nan a comparti cu gobierno, caminda ta wordo indica cu un 60% di esunnan cu ta buscando tereno pa lanta un cas den un area di 280 pa 450 meter cuadra. Oduber a indica cu nan ta concentrando riba e tipo di tereno aki, pa asina tin tereno disponibel.