Despues cu hues a stop accion ayera di sindicato di maestro SIMAR pa retrasa orario di scol, prome minister Evelyn Wever-Croes a duna indicacion cu tambe ta bay pidi un medida disciplinario, esta un ordemaatregel, contra sindicato SEPPA.
Esaki segun un relato di portal noticiero NoticiaCla. Segun NoticiaCla, prome minister a confirma na nan ayera mainta cu ta bay pidi e medida contra SEPPA despues di e medida cu a pidi diamars atardi contra sindicato SIMAR. Hues a pidi sindicato SIMAR diamars atardi pa stop cu nan accion pa diaranson mainta, pendiente un caso sumario den cual gobierno ta pidi un medida disciplinario. Na e momento ey, sindicato SEPPA, cu ainda no a haya un peticion di hues, a anuncia cu ‘nan accion si ta sigui’, segun e relato di NoticiaCla. Como resultado, gobierno a tuma accion tambe contra SEPPA.
Bon Dia Aruba a tuma contacto cu PR di prome minister, Joally Croes, pa confirma e informacion aki. Croes a dirigi nos reportero na pagina di Facebook di sindicato SEPPA, unda e sindicato a informa cu ta stop tur accion pendiente kortgeding.
