Ayera gobierno a convoca un conferencia di prensa extraordinario tempran, caminda prome minister Evelyn Wever-Croes(MEP) a bisa claramente cu no tin amnistia pa e hendenan di afo cu ta ilegal na Aruba. Igualmente el aclaria cu dunamento di status di asilo politico no ta algo cu ta wordo duna ‘asina asina’.

E mandatario a condena e rumornan cu a cuminsa circula den bispo di eleccion cu lo tuma luga na Venezuela diadomingo awor, gobierno di Aruba ta dunando amnistia. Enfaticamente el a bisa cu: ‘esaki no ta corecto!’. E regla cu ta sigui na vigor ta cu si e persona cu a bin di afo tin un permiso, e por keda na Aruba. Pero si e persona no tin un permiso, e persona no por keda na Aruba. Esey ta e caso y nada a cambia, el a bisa.
Formulario asilo politico

Igualmente el a referi na e cantidad di hende cu ta acudiendo na Dimas pa pidi y yena formulario pa asilo politico. Segun e mandatario cu asilo politico ta algo serio, ya cu bo por haya solamente e status aki si bo bida ta core peliger den e pais cu bo a bin di dje. Y e ta algo masha excepcional, masha poco otorga na Aruba durante e ultimo añanan. No ta cuestion di elimina e formulario aki ya cu e tin un proposito, y e tin cu keda ya cu nos pais ta afilia na tratado internacional. Pero debi na mal informacion divulga, a wordo crea un expectativa cu e personanan lo wordo yuda pa cualkier otro cos, locual no ta e caso.

Encuanto e procesamento di e formulario, esaki no ta tuma luga den 24 ora. Locual cu si e mandatario a bisa ta cu e persona cu a aplica pa asilo politico, nan peticion ta wordo procesa den un periodo di 2 pa 3 dia. Den e lapso ey e persona por haya a lo menos un impresion cu si e ta un persona cu di berdad por bin na remarke. Si e persona ta bin na remarke, e persona aki mester cana tur e procedura, entre otro entrevistanan y screening. Si e no ta bin na remarke, e persona ta bay haya un no riba su peticion y basicamente e formulario no ta yud’e net den nada , ya cu e ta pa persona cu berdaderamente por demostra cu e bin na remarke pa e status aki.

E ta un situacion diferente na esunnan cu a bin Aruba pa busca un miho condicion di bida y nan ta keda den un situacion di ilegalidad, y awor nan ta percura di purba drecha nan situacion pa medio di un formulario cu ta exclusivo pa personanan cu a huy pa motibo politico y cu nan bida ta core peliger di morto. E persona mester demostra seriamente cu berdaderamente pa su condicion politico su bida ta core peliger di morto. E mandatario a aclaria cu no ta asina cu pais Aruba no ta duna asilo politico ya cu nos ta mara na tratadonan internacional. P’esey persona cu berdaderamente ta den un situacion di asilo politico pasobra bo ta teme pa bo bida, Aruba mester tin e procedura y pa tal motibo nan tin un formulario ey. “Pero esey ta excepcion!”.

Encuanto e formulario entrega na Dimas pa asilo politico, e mandatario a bisa cu algun peticion a wordo haci. Pero di e peticionnan aki ningun a wordo honra te dia di awe. Nan ta wordo revisa y nan ta wordo trata a base di tratado internacional di refugiado.
El a agrega cu excepcionalmente un hende cu ta bin Aruba pasobra e ta teme pa su bida pa motibo politico. Segun e mandatario esunnan cu por tene pa su bida na Venezuela ta politiconan oponente di e regimen cu tin temor pa nan bida si nan ta keda den e pais ey. E caso extremo ey ta wordo aplica e tratadonan internacional y tin e formularionan pa wordo trata como asilo politico. Sinembargo e no ta kere cu den e avalancha di hende cu a presenta na Dimas antayera y ayera, tin personanan cu a huy for di Venezuela pa motibo cu nan bida ta core peliger.

Asilo politico y migrante
E ta considera importante y specialmente mirando e situacion na Venezuela, pa haci un distincion entre asilo politico y migrante.
Den e categoria ultimo aki ta cay e mayoria di persona cu ta bin Aruba pa busca un miho futuro y pa biba mas trankil. E personanan aki – segun e mandatario a enfatisa- nan no ta cay bou di derecho pa haya asilo politico, por lo tanto nan no mester aplica pa asilo politico. Ya cu den e casonan asina nos ta papia di migrantenan y no di refugiadonan, y nan por keda Aruba solamente si tin status legal. Si nan ta ilegal nan ta core e riesgo cu nan ta wordo deporta.

Premier Wever-Croes tambe a referi na e presencia den e conferencia aki di directora di Dimas, Kathy Paskel y hoofd di Rampenbureau, Rino Hermans. El a laga sa cu ora gobierno ta trata e tipo di topico aki di asilo y refugiadonan, nan ta temanan cu nan tin riba nivel mas halto. E presencia di e dos funcionario aki ta pa garantisa cu te ainda gobierno tin e situacionnan aki bou control y gobierno ta pidi nos comunidad cooperacion. Pero e preocupacion t’ey y na momento cu e situacion ta scala e ta un crisis y pa tal motibo Rampenbureau ta envolvi. Presencia di sra. Paskel ta debi cu tambe nan ta papiando di proceduranan na Dimas tambe.

Pero el a expresa un biaha mas su preocupacion cu e situacion na Venezuela, y mas ainda e consecuencianan pa nos pais. Ainda e no a papia cu e Consul nobo di Venezuela Mata Figueroa cu a haya su credencial diplomatico caba fei Hulanda pa atende cu e asuntonan aki personalmente. Tampoco e mandatario no sa si e ex militar aki a bin Aruba caba, ya cu como minister encarga cu e contacto cu relacion exterior di Hulanda, no a haya notificacion cu e consul a bin Aruba. Si nan ta atende algun asuntonan cu e vice-consul di e cuerpo consular aki.

Minister di husticia, Andin Bikker(POR) tambe a referi na e topico aki, caminda basicamente el a reafirma e posicion di gobierno expresa pa minister presidente rond di e diferencia entre asilo politico y migrante cu ta bin Aruba pa traha y biba. E mandatario Bikker a bisa cu Aruba tin un plan di calamidad pa atende cu cualkier crisis na Venezuela cu lo por afecta nos. E plan aki ta wordo ahusta regularmente na e realidad cu ta wordo presenta relaciona cu e situacion den e pais bisiña.