Dialuna mainta Minister di Husticia Andin Bikker(POR) a papia tocante e situacion di asilo politico tambe e procedura di Schipholmodel, ESTA pa e Venezolano y e prolongacion di frontera cera.
Na luna di september aña pasa e mandatario a splica cu na reunion na New York hunto cu UNHCR a palabra pa stop di emiti e certificado cu ta crea impresion den persona cu nan lo por keda riba Aruba cu un certificado duna pa autoridad di Nacionnan Uni. Pa e motibo aki a bin cu un unidad di asilo pa trata e peticionnan cu drenta.
E ta expresa cu ta bayendo den un ‘speed’ pa tuma decision riba e aplicacion aki, sinembargo e ta bisa cu a constata cu gran mayoria di e peticion ta haci uzo indebido di e peticion.
E mandatario a splica cu nan intencion ta pa alarga nan estadia na Aruba y no ta cumpli cu merito pa haya un proteccion bou di e tratado. Pa e motibo aki Minister Bikker ta enfocando riba e maneho pa Schipholmodel, cual por medio di cambio den ley lo haya un base legal pa por ehecuta.
Mayoria persona cu ta pidi asilo ta yega Aruba sin duna indicacion di kier pidi asilo, pero despues di algun tempo permaneciendo riba nos isla, nan ta ricibi informacion cu e ta posibel pa haci un peticion anto ta bay pidi asilo. “Nos a dicidi maneho di transicion, nos no ta bay tolera cu ta prolonga nan estadia na Aruba.”
El a remarca cu Aruba ta chikito y tin reto cu tin cu atende cu comunidad. E maneho estricto pa aplicante di asilo, desde cu e unit asiel a cuminsa procesa un gran mayoria cu a bay corte a perde nan caso, decision cu procedura cu ta wordo cana. Un grupo chikito ta esunnan cu aplicacion tin derecho bou tratado.
Semi hurista ainda purbando nan suerte
Sinembargo a puntra e mandatario peticionnan di Dimas cu ainda ta wordo honra. Unda cu e persona ta yega Aruba pagando un suma di 2500fl anto nan tin cu keda meldplicht cada dos siman. Esey ta un papel valido manera di asilo?
El a contesta cu no por exclui esunnan cu ta sigui haci mal uzo di situacion fastioso y fragil cu hende ta pasa aden. “Aki na Aruba tin semi hurista cu a wordo deteni den diferente crimen cu ta sospecha di a comete den e mesun situacion aki, y persona ta sigui haci mal uzo. Nos di nos banda a bin cu diferente maneho cla. Ora nos a constata cu tin persona cu ta haci uzo indebido di e procedura, nos a bin cu un asilo unit cu ta tuma di biaha decision.”
ESTA pa Venezolano den proceso
Lo pone ESTA pa Venezolano, pero e mandatario a splica cu e base huridico a wordo poni na december ora cu a bay pa cambia ley di LTU den artikel 20 pero di eynan amplia den un decreto. E decreto ta un procedura cu ta traha pero ainda tin cu bay Raad van Advies (RvA) unda ta bin cu su conseho. Tin cu tene cuenta conseho, di eynan e ta bay gobernador pa e bira realidad. E procedura ta tuma su tempo.
Sinembargo e mandatario a expresa cu e ta biniendo y nan tin e software cla ‘di basta tempo’. “Pa e Schipholmodel mester introduci e base huridico, esey si ta hopi leu. Mirando con e proceso legislativo ta core mi por bisa cu pa fin di juli por pone esaki ‘in place’.”
Lo sigui prolonga ceramento di frontera
Dia 10 di mei a dicidi di cera frontera entre Aruba y Venezuela net despues cu Venezuela unilateralmente a dicidi pa habri esaki bek. E intencion cu gobierno tin ta pa sigui prolonga e ciere di frontera, mirando e aspecto di siguridad di nos pais.
