Gobierno ta lamenta cu SIMAR ta hibando un agenda politico y ta lastrando maestronan den esaki. Mientras nos muchanan tabata prepara cu entusiasmo pa bay scol, nan entusiasmo a wordo kibra momento cu nan a yega scol y a wordo nenga pa drenta. Mayornan man na cabes pa busca solucion pa nan yiu. Esaki riba su mes caba ta un problema, pero e motibo ta mas problematico ainda. SIMAR a basa e accion di awe riba dos punto.
E prome ta e cortamento di salario di 5%. No ta e “cuanto” pero ta e “forma”. Riba e forma Gobierno a splica na numeroso ocasion dicon a scoge pa e forma aki: pasobra e ta combini e empleado publico. A splica den rueda di prensa di Gobierno di Aruba y a splica na mesa sinta. SIMAR ta e unico sindicato cu no ta of no kier compronde. Y awor ta lastra maestronan den esaki, perhudicando nos muchanan cu a perde scol pa casi 3 luna caba. Anto pakico? Djis pa un wega di no “cuanto” pero “con”! Un wega cu ningun hende na Aruba por influencia pasobra ta Hulanda a dicta den e condicionnan. SIMAR a bay protesta caba na Hulanda y como contesta a haya un Hulanda cu a pone condicionnan mas brabo!
E di dos punto di accion di SIMAR ta e cambionan den enseñansa. Otro punto discutible. E gran mayoria di e cambionan ya a wordo para caba. Ta keda un of dos cambio cu ainda ta trahando riba dje.
Tanto Minister President como Minister di Enseñansa a declara caba cu ningun scol publico ta wordo traspasa pa stichting. Cu EPI no ta bay cay bou di EPB. Cu NO ta fuseer scolnan. Kico mas SIMAR kier? Bay protesta na Hulanda atrobe pa haya mas condicion brabo?
Aruba ta den un crisis hopi serio. Den e crisis aki no tin espacio pa cosnan asina. Gobierno di Aruba ta lamenta e accion di SIMAR y ta haci un apelacion fuerte riba tur docente di Aruba cu tin enseñansa y nos muchanan realmente na pecho: no cay den e weganan aki. Prome cu bo bay den accion, wordo bon informa.
