Gobierno di Aruba a cuminza duna algun respuesta riba e publicacionnan di parti di e organismo di supervision financiero CAft, relaciona cu presupuesto 2022. E proceso di conseho di CAft riba e presupuesto ta den su fase final, unda gobierno tin te dia 24 di e luna aki, un siman apenas, pa formula un contesta convincente pa e consehero di gobierno di Reino. Despues, si e contesta no ta satisface, o no tin contesta mes, lo bay un notificacion di e colegio di supervision pa Gobierno di Reino cu, dependiendo di e seriedad di e caso segun CAft, por si of no contene e propuesta di un ‘aanwijzing’. Y no tin indicacion cu gobierno di Aruba lo bay cumpli, faltando un siman. Por ta cu ta laga e medidanan impopular bay Hulanda bin tuma nan?

 

Te awor aki, ta CAft ta blanco di critica di gobierno y nan simpatizantenan, pero no ta CAft a inventa e ley di supervision di Aruba di 2015 (LAft), cu te awe gobierno di Aruba y Hulanda ta reconoce como valido y vigente. Al contrario, e colegio a haya bida como consecuencia di e acuerdo y ley na 2015 cu gobierno di e tempo ey pa duna e supervision un bachi Arubano, loke no tabata corecto y awor lo bin e coreccion den un ley di Reino, cu igual efecto. Kier of no kier, tin supervision financiero, pa bon motibo.

Mientras tanto nos a mira reaccion e siman aki di nos ministro encarga cu Finanzas, cu a ridiculiza henter e asunto bisando cu ta algun medio ta anda cu e tema di ‘aanwijzing’ mientras cu “no tin aanwijzing riba mesa”. Textualmente e ministro tin razon cu no tin aanwijzing ainda riba mesa, pero tur cos ta indica cu aki un siman nos por ta den e situacion ey si. Y esun cu a usa e palabra na promer momento no ta prensa, sino e propio presidente di CAft den su ultimo carta, unda e obligatoriamente a pinta pa gobierno di Aruba e resto di e proceso segun e ley cu lo cana, si cos yega asina leu. Simpatizante di gobierno por mira esey como un menaza; como muestra di ‘colonialismo’; otronan lo interpreta esey como e ruta logico cu lo bay tuma lugar, y pakico? Pasobra te awor gobierno di Aruba a cumpli solamente cu un di 13 puntonan cu CAft ta considera necesario como cambio den presupuesto 2022, sin cu ta duna cara pa enfrenta e problema.

Y awor, como un defensa bastante laat den e proceso, nos por a mira nos Promer Ministro bin dilanti e siman aki pa trata di ilustra cu gobierno ta trahando riba e tema di reduci gasto di personal. E arma escogi: e areglo di VUT (Vrijwillige UitdienstTreding). Por a scoge pa algo mihor, si tabatin… E caso ta cu e VUT ta existi pa mas di 20 aña caba y a ser usa pa diferente gobierno pa mustra cu nan ta(bata) haciendo algo pa limita gasto di personal. Y cu ki resultado? Cu despues ta bolbe yena oficina di gobierno cu hende nobo cu mester fabor politico. Aki e dos partidonan grandi no tin nada di critica otro, nan tur dos a haci uso di esaki pa fingi cu ta haciendo algo riba tereno di personal. Y pakico? Pa motibo cu nunca VUT a duna gran resultado y si nos no ta hera, nunca esaki a surpasa 100 persona den cada intento.

Ademas di esey, e problemanan grandi cu ta ocasiona aumento continuo di gasto di personal, manera e adaptacion automatico di e salarionan di tur ambtenaar, e asina yama ‘periodiek’, a keda for di vista te awor. Y mientras cu ta net esey a palabra cu Hulanda, pa loke ta e Uitvoeringsagenda, cu lo bay atende e asunto aki. Unico ‘problema chikito’ ta cu esaki ta toca cartera di tur empleado publico y pesey gobierno no ta mishi cune… Pregunta ta e ora, pakico ta acorda cierto cos cu Hulanda, pa finalmente no cumpli pasobra e lo tin consecuencia politico? Nos no ta bisa cu ta totalmente ilegitimo pa un gobierno tene cuenta cu consecuencia electoral, pero esey mester bay asina leu cu no por tuma bo palabra na serio mas? Pasobra esey ta loke nos ta tende di diferente fuente Hulandes cu, papiando di nos gobierno, ta bisa textualmente “die mensen houden zich aan geen enkele afspraak”. Y si nos mira e ‘performance’ den e proceso di reforma cu a acorda cu Hulanda, nos ta mira un proceso largo di mas di dos aña, cu avance minimo riba cualkier tereno.

Bon mira mester reconoce anto cu e problema no ta tanto CAft, nan ta simplemente haci nan trabao di consehero, tambe pa gobierno di Aruba na promer instancia, pero si ey no ta mira avance anto ta hiba e caso pa Gobierno di Reino. Cu menos di un siman pa bay, nos no ta mira gobierno bay cumpli cu e puntonan proponi pa CAft. Mas bien atencion lo ta bay caba na arma un defensa pa ora e problema yega na Conseho di Ministro di Reino. Si e defensa ey ta di e calidad pesimo demostra te awor den nan argumentonan treci dilanti, anto esey tampoco lo bay impresiona. Por ta cu ta laga e trabao dificil, di reforma berdadero na Den Haag, pa despues organiza protesta contra nan?