Gobierno a anuncia ayera cu entrante 14 di november no ta cobra mas pa parkeer den oranan di 3 pa 6or di atardi. Tambe lo elimina klem y Setar lo instala puntonan di wifi gratis.
Gobierno a introduci e parkeermeter pa asina baha e cantidad di auto mal para den Playa y tambe genera entrada pa cubri gastonan di tram. Esaki tabata mas tanto e maneho di Otmar Oduber cu a tuma su retiro como minister di Turismo. Den e reaccion di prome minister Mike Eman riba e retiro aki ya el a indica cu lo adapta e tarifanan di parkeer.
Perdida
Ayera el a specifica esaki, bisando cu e parkeer awor ta gratis na Playa entre 3 pa 6or di atardi. “Sin duda esaki tin su impacto riba entrada di e compania aki. Na e momentonan aki ya caba Arubaparking tin perdida y mester busca incentivonan con evita cu e perdidanan aki no bira mas grandi.” Con gobierno ta bay haci esaki no ta conoci ainda. Prome cu e introduccion di e parkeermeter e compania Arubus tabata den cifranan cora, luchando cu e gastonan enorme tambe di e tram (mas cu miyon pa aña). Cu e entradanan di parkeer ex minister Oduber kier a cuminsa soluciona e situacion aki. Pero awor a bira cla tambe cu e compania nobo cu Sr. Oduber a lansa, Aruparking, ta sufriendo tambe di perdida.
Boet en bes di klem
Prome minister Eman tambe ta splica cu e klem ta algo cu ta ‘bay pertenece na pasado, ya cu esaki ta causando hopi molester cerca tanto e turista como localnan’. “E miho opcion ta pa duna esnan cu pasa over di nan tempo of ta mal staciona un boet y manda esaki na nan cas. Un klem, aparte di ta un mahos bista, semper ta funciona contra productivo.”
Habri Caya bek pa auto
E medidanan aki ta pa trece mas bida bek den e centro di Playa. Desde e introduccion di e parkeermeter comerciantenan ta keha cu nan entradanan a bay hopi atras. Ayera gobierno a anuncia mas actividad pa atrae publico, siguramente awor cu e dianan di fiesta ta dilanti porta.
Un otro punto cu ta den deliberacion ainda ta pa habri Caya Grandi pa autonan core anochi.
