Den un entrevista algun siman pasa cu sra. Lisette Gomez: Stop Abuso Sexual di Mucha, Bon Dia a subraya con a pasa un aña despues di e marcha contra abuso di mucha y ainda e fundacion ta mesun caminda. Nan ta haya cu gobierno ta un di e motibonan  principal  pakico cos no ta canando mas lihe pasobra nan ta keda wordo pusha di cashi pa muraya cada bes.

Manera cu nos a informa anteriormente, e fundacion a entrega un manifiesto na gobierno aña pasa como tambe un otro na ministerio publico den februari di e aña aki.  Un di e puntonan cardinal cu e fundacion ta trece pa dilanti ta entre otro introduccion di un meldcode y esaki ainda no ta na vigor. “Ora nos tin un entrevista of reunion, gobierno ta uza hopi palabra grandi pero inhoudelijk nan no por bisa nos algo concreto kico nan por haci pa e muchanan,” miembro di e fundacion sra. Julie Partosemito ta conta nos. Despues di tur e temponan aki e fundacion ta sinti cu nan ta wordo trata manera “algo fastioso” cu tur hende ta djis spera di no tende nada mas di dje.

Cooperacion cu otro fundacionnan
E fundacion aki tabata tin un charla cu Fundacion pa Hende Muhe den Dificultad algun tempo atras pero nan ta bisa cu ta masha tiki nan ta wordo inclui den charlanan of actividadnan. “Hopi biaha tur otro fundacion ta wordo inclui den un reunion pero casi nunca nos como fundacion ta wordo invita. Ora cu bo ta apoya un causa, bo tin un solo meta. Anto esey nos no ta sinti cu no tin un meta den tur fundacionnan,” sra. Partosemito ta comenta.

 Shete aña riba lucha
Esunnan den e fundacion ta hendenan cu ta traha y tin bida normal cu responsabilidadnan personal, pues no tin esaki como profesion of lo tin’e tampoco. “Esaki ta djis un fundacion pa duna un push  y ken sa si un dia nos lo yega na algo mas grandi. Pero ya nos ta shete aña largo caba pa wak e cambionan necesario,” sra. Gomez ta bisa. E sa pasa cu e fundacion ta haya diferente caso unda hende ta acudi cerca nan pa ayudo of conseho.

“Recien mi a haya un caso unda cu e mayornan tabata hopi rabia con esaki a wordo atendi. Prome cos cu ta drenta nan cabes ta cu nan kier un dokter pa wak nan yiu pa wak si algo berdad a pasa, cual no ta bay asina.” Tambe nan a yega di haya caso unda tin acusacionnan cu no tabata berdad, cu prueba den man. “Nos ta conseha nan e caminda normal y e unico caminda cu tin aworakinan di bay entrega un keho y for di eynan warda te ora haya cita cu un dokter pa e wak e criatura. Tur cos a keda bij deze mescos,” sra. Gomes ta bisa.