Minister di Economia, Richard Arends ta bisa cu gobierno ta calculando un crecemento economico basta modera di un 3.4%. Esaki a base di calculacion di Banco Central. Aunke ta mustra, entre otro recien a base di analisis di CAft cu e crecemento pronostica ta uno irealistico.
Un di e actividadnan cu mas lo contribui cu nos economia tin di haber cu e companianan relaciona cu industria petro- kimica cu ta habriendo pa brinda su servicio den e refineria. E mandatario a sigura door di e contacto cu nan tin cu Citgo, cu nan cumplimento cabalmente cu nan obligacion fiscal, laboral y huur. Kiermen gobierno no tin niun duda cu e rehabilitacion di e refineria lo tuma luga debidamente. Minister Arends ta haci algun comparacion pa ehempel cu reapertura di Valero mes na 2010-11 cu a produci un crecemento economico di casi 9%. Mientras cu e inversion e tempo ey tabata hopi mas chikito compara cu e inversion cu nan ta mirando actualmente cu Citgo.
Cifranan
E ta haya cu 2017 ta un aña positivo mirando e cifranan. Ya cu ademas di e rehabilitacion di e refineria cu ta alrededor di 800 miyon dollar den tres aña, gobierno ta sigui cu inversion den infrastructura y area publico entre nan e di dos fase di e rehabilitacion di San Nicolas, Imsan, hospital y finalisacion di Green Corridor cu ta un total di casi 320 miyon florin. Igualmente un suma di 120 miyon florin pa loke ta trata sector hotelero y turistico pa mehora e producto Aruba.
“Djis un calculacion cortico, nos ta wak caba un suma di caso 1 biyon florin na inversion pa loke ta trata aña 2017 den sector priva.”
