Un otro inversion grandi di parti di Gobierno di Aruba na e bienestar di e ciudadanonan ta trata di e aumento riba e salario di empleadonan di e sector priva cu ta gana maximo 2500 florin pa luna.
Prome Minister Evelyn Wever-Croes, durante e Conferencia di Prensa di Gobierno di Aruba recientemente, a indica cu ta trata di un total di 6000 persona cu ta haya un aumento di 600 florin pa aña y e gastonan envolvi pa aña 2024 ta di 1.5 miyon florin y pa aña 2025 lo ta 3.6 miyon florin.
“Manera ta conoci, no ta Gobierno ta paga e salario di e trahadonan aki, sino e doño di e empresa unda nan ta labora. Loke si Gobierno ta haci ta cu e ta duna e trahado di sector priva un toeslag riba su entrada y akinan e trahado a ricibi un aumento recientemente. Mi ta reitera cu un di e metanan principal di nos gobernacion ta pa e progreso cu Aruba ta bibando na e momento aki wordo converti den prosperidad y bienestar pa tur ciudadano na Aruba”, Prome Minister a expresa.
Aumento
Riba e tabel adhunto por observa e cantidad di reparatietoeslag paga segun e salario di e empleado. Compara cu e cifranan anterior, cual tabata pa 1 di januari te cu 31 di juli 2024, e aumento ta representa Afl. 50 pa cada bracket. Es decir, e reparatietoeslag pa un persona cu ta gana di 1986.20 florin te cu 2050.- florin pa luna, a aumenta di Afl. 125 pa Afl. 150.
Personanan cu ta ricibi salario menos di 2500 florin pa luna y ta bin na remarca pa reparatietoeslag, por yena e formulario pa esaki a riba website di Departamento di Impuesto, https://www.impuesto.aw/particulier-formulieren-en-toelichtingen/reparatietoeslag.
