Ayera mainta durante conferencia di prensa, Minister di Turismo y Salud Publico, Dangui Oduber a elabora ariba e decision di Gobierno di no introduci e contribucion propio (eigen bijdrage) mas na Aruba y kico lo reemplasa e contribucion propio pa asina yuda baha gastonan di AZV, cual ta un tarea cu Gobierno di Aruba tin conforme instruccion di BZK di Hulanda.

Manera a keda anuncia algun dia atras, Gobierno di Aruba a tuma e decision pa no continua cu e introduccion di contribucion propio. Gobierno a splica cu nan a dicidi pa no introduci esaki pasobra nan no tabata di acuerdo cu e pensamento di CAft ariba e tema aki.

Minister Oduber a splica cu CAft su pensamento ta cu nan ta di acuerdo cu ora introduci un contribucion propio mester di un vangnet, pero CAft a bisa cu e vangnet cu Gobierno di Aruba a presenta tin demasiado persona den dje. Gobierno a presenta un manera con pa financia e contribucion propio tambe pa medio di un fondo presupuestario y segun Minister Oduber ta indica, CAft tabatin un opinion negativo ariba esaki y no ta di acuerdo cu e introduccion di e fondo presupuestario aki.

Mirando e situacion, gobierno mester a busca otro alternativa pa e hecho cu no ta introduci e contribucion propio mas. Minister Oduber a sigui splica cu e contribucion propio lo mester a spaar entre tres pa cuater miyon florin pa aña. Pa por cumpli cu e instruccion di Hulanda, e alternativa ta cu lo bay reduci gasto den remedi.

“Nos a informa CAft tambe e motibonan pakico nos no ta sigui cu e introduccion di contribucion propio y nos a splica nan tambe durante reunionnan, nos a comparti tur e informacion aki cu nan kico nos ta bay haci na luga di contribucion propio, kico ta reemplasa e contribucion propio y cuanto esaki lo por spaar den e tarea cu nos tin di reforma e gastonan di AZV”, Minister Oduber a bisa.

El a indica cu nan a conduci un estudio den diferente sesionnan cu importadornan di remedi, AZV, Inspectie der Geneesmiddelen, cu boticarionan tambe y a base di tur e reunionnan aki y a base di e estudionan cu a haci conhuntamente cu AZV, a conclui cu tin un potencial hopi grandi pa modernisa e leynan y baha gastonan di remedi.

E alternativa cu gobierno a presenta na CAft, en bes di sigui cu e contribucion propio cu lo afecta e asegurado, nan ta bay enfoca pa baha e gastonan di remedi. Esaki lo wordo logra pa medio di haci cambio den e decreto di remedinan, Landsbesluit Verpakte Geneesmiddelen, y esaki ta a base di e siguiente puntonan di cambio cu lo percura pa baha e gastonan di remedi pa Aruba cumpli cu e reformanan cu mester cumpli cune conforme instruccionnan di BZK di Hulanda cu ta para tambe den e acuerdo cu Aruba tin cu Hulanda pa haci e reformanan aki.

Como prome punto, Minister Oduber a indica cu nan ta bay stimula competencia. Segun el a splica nan ta bay percura pa e prijs di botica cu lo bay tin, ta e base di un guia central pa calcula e prijs di e remedi importa. Aworaki esey no ta e caso.

Nan ta bay introduci tambe un structura di dialogo a base di cual lo reuni regularmente cu e sector, importadornan, boticarionan, cu hospital y AZV ariba e tema di con pa baha prijs di e remedinan caro.

Minister a menciona tambe cu nan ta bay facilita e proceso di registracion di remedi. Remedinan cu ya caba ta registra na Hulanda, Europa, Merca of Canada, e proceso di registracion lo wordo acelera. Esey no ta e caso na e momentonan aki y segun el a señala door di acelera e proceso aki pa e remedinan cu ya caba ta registra na e paisnan menciona, naturalmente esaki lo conduci na reduccion di gastonan tambe.

“E cambionan aki den e Landsbesluit Verpakte Geneesmiddelen ya caba ta canando y e besparing cu nos ta premira door di haci e cambionan menciona, nos ta kere lo ta entre shete cu ocho miyon florin pa aña y esaki nos lo mira mas tanto te aña 2023”, el a agrega.

Esaki ta e alternativa cu Gobierno di Aruba a presenta na CAft, cual minister ta enfatisa nan a splica detayadamente kico ta e cambionan, con nan ta bay haci, cuanto placa na final di dia esaki lo spaar. “Nos ta spera cu di e forma aki nos por sigui haci e ehercicionan necesario pa logra cu e fondonan di AZV ta keda manehabel, e fondonan ta keda sostenibel y cu e gastonan ta keda pagabel pa un y tur”, el a remarca.

Minister Oduber a subraya cu esaki ta un bon decision cu a wordo tuma pa Ministerio di Salud, conhuntamente cu coleganan den Conseho di Minister. El a agrega tambe cu oposicion no lo ta contento cu esaki pasobra, segun minister ta comenta, si ta pa oposicion algun tempo atras caba gobierno lo a introduci e contribucion propio.

“Continuamente ora nos bay parlamento fraccion di AVP cada bes ta puntra ansiosamente ki dia gobierno lo introduci eigen bijdrage. E ta un lamento pa nan awe cu e introduccion di eigen bijdrage no ta continua.”

Minister di Salud Publico a contesta pregunta di miembronan di prensa caminda el a indica cu no solamente na Aruba, pero mundialmente ta conoci caba cu hopi pais a bay over na remedinan generico, y remedinan generico obviamente prome cu nan subi mercado ta wordo getest y certifica, sigurando cu ta remedinan di bon calidad cu no tin efectonan secundario pa e asegurado.

El a resalta cu na Aruba tambe un gran cantidad di remedinan generico ta wordo suministra, casi un 50% ta remedinan generico, pues e no ta kere cu e ehercicio cu nan ta bay haci ta cu e intencion pa reduci e calidad di e remedinan.

Minister Oduber a señala tambe cu parti di e acuerdo di DCHA (Dutch Caribbean Hospital Alliance) ta cu Corsou, Sint Maarten y Hulanda lo cumpra remedinan hunto, pasobra e ora por cumpra den volumen y na momento cu haci esaki tin espacio pa negosha un miho prijs y asina logra reduci e gastonan.