Durante conferencia di prensa di gobierno, Minister President demisionario, Evelyn Wever-Croes a anuncia e medidanan nobo pa e maneho di COVID-19 na Aruba, mirando e aumento drastico di casonan activo pa COVID-19.
Medidanan nobo anuncia pa Min. President demisionario cu lo drenta na vigor diasabra 7 di augustus ta como lo siguiente: tapaboca ta bira obligatorio bek paden tur establecimento, orario di cierre pa tur establecimento ta 12:00 am pa 6:00 am, sin ningun excepcion, prohibicion di area publico, beach y parking lot, tambe ta for di 12:00 am te cu 6:00 am y uso di alcohol ariba propiedad publico ta keda completamente prohibi durante henter dia.
Segun resumen di dia 5 di augustus 83 persona a recupera y un total di 128 caso nobo di COVID-19 a keda registra, di cual 2 ta no-residente y 116 ta residente. E cifranan aki ta representa un positivity rate bou di residente di 30%. Total di casonan activo di COVID-19 ta na 675 y e cantidad di fayecidonan relaciona cu covid ta 111.
Hospital tin 21 persona interna di cual 6 ta den intensive care y 15 ta riba piso general. Datonan di hospital ta mustra cu di e personan hospitalisa cu covid, 19 di nan no tin ningun vacuna y solamente 2 persona tin e prome y e segundo dosis di vacuna. Di e personanan interna den intensive care ningun tin vacuna.
Min. President ta enfatisa e importancia di vacunacion , mirando cu 90% di e personanan admiti den hospital, segun datonan di hospital, no ta vacuna. Y el a informa pueblo tambe cu e variante Delta ta presente pa 80% di e casonan di COVID-19, mustrando cu mayoria di e casonan ta di e variante Delta.
