Keto bay gobierno ta keda referi na ‘Citgo’ como nan partner pa reapertura di e refineria. Apesar cu e ‘Citgo’ cu a cuminsa negocia na 2015 mes ta bisa cu nan no ta participa den e acuerdo cu gobierno di Aruba. Na luga cu gobierno duna un claridad kico ta kico y ken ta ken, nan ta insisti den crea confusion den e asunto aki. Un bon ehemplo di esey ta e carta cu ministro encarga cu energia a manda como contesta pa presidente di parlamento. Den e cabes di e carta, di 22 di juni ultimo, ta poni como asunto “ Rehabilitatie en hervatting raffinage-activiteiten pa Citgo Petroleum Corporation”. Esey ta 11 dia despues cu e compania aki a declara publica y categoricamente cu nan no ta parti di e acuerdo cu Aruba.
Mientras cu e titulo di e carta ta referi na e compania cu normalmente ta identifica cu e nomber ey, mas den e texto ta duna un otro storia cu no ta asina facil pa clarifica pa un persona cu no conoce tur detaye di e asunto. E texto di e carta ta bisa:”De Definitive Participation Agreement, de Refinery Lease Agreement, de Terminal Lease Agreement, de Terminal Service Agreement, de Umbrella Dispute Settlement Agreement, alsmede de aanvaarde Parent Company Guarantee van PDV Holding Inc., zijn met Amerikaanse entiteiten in de V.S. en/of hun Arubaanse dochtervennootschappen aangegaan.
Pregunta clave: si porfin den e texto aki gobierno ta duna di conoce cu e acuerdonan firma ta cu entidadnan Mericano y/o nan subsidiario na Aruba, pakico nan no ta duna claridad di biaha cu e deal no ta cu Citgo Petroleum Corporation, sino cu otro entidad den e aglomeracion di compania na Merca, tur propiedad di PDVSA y por lo tanto di estado Venezolano? Y pakico esaki ta asina importante? Pasobra ta trata dos punto clave den henter e asunto aki: responsabilidad legal y responsabilidad financiero pa e proyecto na Aruba.
Den e carta aki gobierno di Aruba mes ta duna di conoce cu esun cu a firma un garantia ta PDV Holding Inc., cu ta propietario (indirecto) di Citgo Petroleum Corporation. PDV Holding ta propietario di un holding nobo lanta na februari di e aña aki, specialmente pa e proyecto na Aruba, cu yama Citgo Aruba Holding LLC. E ultimo holding aki ta propietario di e cuatro companianan cu nomber Citgo cu a lanta na Aruba. Kico tur esaki ta significa? Cu e compania cu cual gobierno tabata negocia, a keda completamente pafo di e acuerdo aki, tanto den sentido legal como responsabel pa busca financiamento. Y pakico esaki ta importante? Pasobra ta Citgo Petroleum Corporation tin bon reputacion na Merca y den mundo financiero internacional, pero esey no ta conta pa PDV Holding ni pa su propietario PDVSA. Y si legalmente a crea e distancia entre Citgo (e ‘original’) y e otronan nobo na Merca y Aruba ta pasobra no por a pone sin mas e existencia di e compania original na peligro sin repercusion legal. Esey ta indica cu tin riesgo financiero anto?
E pregunta grandi cu ta surgi awor no ta si tin acuerdo of no, pero si lo tin financiamento si of no. No ta pornada ta surgi bastante inkietud bao di parlamentario y gobernante Hulandes cu kier sa na placa chikito den ki aventura Aruba su gobierno ta hincando e pais aki, mientras cu gran parti di Aruba ta kere cu tur cos ta color de rosa y no mester preocupa. Ta p’esey gobierno di Reino a tuma e paso bastante no comun pa urgi gobierno di Aruba pa pasa e documentacion di e caso pa CAFT, pa nan por haci nan analisis di e riesgonan cu Aruba ta core eventualmente.
Y esunnan cu ta kere cu esaki ta un asunto interno di Aruba, y cu Hulanda no tin nada di bisa, pensa un biaha mas. Aña pasa nos a scapa di supervision financiero directo y tabata mag di hinca e supervision den un ley local, pero esey no a cambia caracter di e asunto. Hustamente pasobra e acuerdo por tin consecuencia (por ta positivo tambe) pa presupuesto y estado financiero di gobierno, CAFT tin tur derecho di haya cuanto un documento cu nan ta considera necesario pa haci nan trabao. E argumento cu gobierno ta uzando contra esunnan local cu a pidi documento, cu no por duna nan pasobra a palabra cu Citgo/Valero cu tur cos ta secreto, no por uza ora ta trata di CAFT. Aparentemente mester a bin un ‘peticion urgente’ di Conseho di Ministro di Reino na gobierno di Aruba pa suministra e documentonan na CAFT. Esaki ta indicacion caba cu gobierno te awor a tranca y no kier a duna nada, si no nunca e asunto lo a yega na nivel di gobierno di Reino. Posiblemente nos ta na bispo di un siguiente midimento di forsa den Reino. Nos ta tende gobierno di Aruba ta grita caba cu esaki ta un asunto interno. Y esey no ta berdad. Desde 27 di augustus 2015 asunto financiero di Aruba ta asunto di Reino, gusta of laga.
