Minister Glenbert Croes di Asuntonan Social ta anuncia un estudio pa ‘deshaci e fenomeno di e uitzendbureau’.
E mandatario ya a bisa na december aña pasa: “Lo mi tin deseo pa na momento cu e cuater añanan di mi como minister di Asuntonan Social y Labor termina, mi lo por bisa cu nos ta bibando riba un Aruba liber di uitzendbureau nan.”
Bon Dia Aruba a purba desde e expresion ey, pa haya comentario for di e uitzendbureau nan pero no a logra. Awor e minister a sigui riba su promesa y ta anuncia cu lo bay haci un estudio pa caba cu e sector aki. Di otro banda den e mesun relato e ta papia di regulacion di e sector.
“Tin di e contratistanan cu ta conoci den e mundo laboral di ta culpabel di sclavitud moderno y esaki ta pa nos Minister di Labor actual inaceptabel. Pero minister no kier generalisa pasobra Glenbert Croes ta compronde cu ta danki na algun di e companianan aki cu hopi hende a haya e oportunidad di yega na un trabou digno. P’esey pa su persona awe cu orguyo e ta anuncia cu e estudio intensivo a cuminsa con pa formalisa y regula uitzendbureau na beneficio di tur partido envolvi”, asina e relato manda di su parti, a bisa.
Asina cu e estudio keda cla, minister ta bisa cu e lo anuncia oficialmente di kico lo ta e siguiente pasonan.
