Ayera habitante di Parkietenbos Anouk Balentina a haci un denuncia na Ministerio Publico pa violacion di e ley di molester (Hinderverordening) contra e ministernan responsabel pa no a sigui e ley ora di instala e incinerator na Parkietenbos y tambe pa e echo cu e dump na Parkietenbos ta estableci en contra di e ley di molester.

Balentina ya tin un tempo ta bringando varios caso, pa asina forsa gobierno di Aruba pa stop e polucion y molester cu ta afecta su persona, su famia y e habitantenan di Parkietenbos. E molester ta encera cu e incinerator ta wordo uza pa kima desperdicio, y dependiendo di e direccion di biento, e ta afecta salud di habitantenan.

E prome caso cu Balentina a lanta, a encera cu e hues civil a dicta cu pais Aruba ta actua contra ley mirando cu gobierno no a warda e otorgamento di e permiso di molester conforme e ley di molester pa por opera e incinerator. E hues na mes momento a dicta cu mester stop cualkier operacion di e incinerator tanten cu no tin un permiso di molester. Pero desde cu e incinerator a wordo instala, algo cu ya caba ta contra e ley di molester, tabata ‘test’ e operacion di e incinerator.

Gobierno ta publica aviso cu a otorga permiso 6 luna despues

Banda di esaki, Balentina a haci un caso administrativo unda 23 di juni hues a trata e caso. Durante e tratamento di e caso, e abogado di pais Aruba di Directie Wetgeving en Juridische Zaken (DWJZ) a indica cu e proceso di otorgamento di e permiso no ta cla ainda. Esaki ta contradeci loke director di DOW Marlon Croes a bisa den un conferencia di prensa dia 17 di juni, unda el a declara cu e permiso a wordo otorga dia 23 di december 2020. Den e Landscourant di 4 di juni 2021 ta indica cu e permiso pa molester pa opera e incinerator a wordo otorga desde 23 di december 2020.

Balentina ta haya cu e manera di opera aki, unda ta publica notificacion cu e permiso a wordo otorga 6 luna despues, ta blokia e derecho di e ciudadano pa busca proteccion legal contra un decision di gobierno na tempo. No solamente esaki, pero Balentina ta di opinion cu DWJZ mester a contesta e obheccionnan cu a wordo entrega. Di e manera aki, gobierno a preveni Balentina y posiblemente otro habitantenan pa 6 luna di por tuma accion contra e permiso cu a wordo otorga.

‘Ley ta conta pa ciudadano pero no pa gobernante’

E mensahe cu Balentina kier trece dilanti cu e denuncia na Ministerio Publico ta cu riba ciudadano tin exigencia pa sigui ley, y si no ta sigui ley tin consecuencia. Pero pa gobernantenan leynan parce cu no ta aplicabel. A base di articulo 1, 2 y 16 di e ley di molester (Hinderverordening) si ta instala un instalacion cu ta crea molester sin a haya un permiso pa haci esaki, e persona cu ta comete e infraccion aki ta haya maximo 2 luna cera na KIA of un boete di maximo 3000 florin.

Na mes momento Balentina a haci un denuncia contra e echo cu e dump na Parkietenbos mes no ta estableci di acuerdo cu e ley di molester. E ley di molester ta indica cu den caso cu ta instala un instalacion cu por causa molester sin permiso, e permiso no ta necesario si a institui esaki via un Landsbesluit h.a.m. Den caso di Parkietenbos e dump a wordo instituti via un Decreto Ministerial.