ORANJESTAD – Awe consumidonan mester paga 13,6 cent mas na pomp pa un liter di gasolin. Un liter ta 9,9 cent mas caro y kerosin a subi cu 8,5 cent pa liter.
Esaki e minister di Asuntonan Economico a informa ayera. Gobierno a emiti dos relato pa motibo cu kier a ‘coregi’ esun cu nan departamento di publicidad BUVO a manda. Den e relato cu e coreccion por a lesa cu nan a hisa e prijsnan ‘basa riba e posting di US Gulf Coast durante periodo di 1 di december te cu 31 di december 2016’.
Bon Dia Aruba ta mira den medionan di comunicacion internacional cu e trend di prijsnan di azeta ta cu nan ta keda baha. Mester tene na cuenta cu den e mundo petrolero a palabra di baha produccion pa asina hisa e prijsnan bek riba nivel, algo cu sigur mester haya efecto na 2017.
Sinembargo e ultimo noticia ta cu e prijsnan atrobe a baha na un nivel mas abou. Den pasado Bon Dia Aruba ya a busca informacion for di gobierno con nan ta calcula e prijsnan y a ricibi informacion cu e calculacionnan semper ta a base di e periodo prome. Pero kico awor ta e hustificacion pa hisa e prijsnan asina hopi, no ta conoci. Bon Dia Aruba lo purba di haya e motibo aki for di gobierno.
Entrante awe un liter di gasolin ta costa 1,79 florin. Un liter diesel a bira 1,48 florin y kerosin awor ta 1,33 florin pa cada liter
