Gobierno ta ‘gaña lubida’ ley di financiamento?

Falta apenas seis luna pa eleccion y nada ainda di presentacion di un ley pa controla donacion financiero na partido politico. Algun tempo pasa cu masha fanfaria un di e parlamentarionan di e partido den gobierno a bay prensa pa anuncia cu e asunto ta kedando cla, pero no a tende nada mas.

Pa nos no mustra sarcastico o cinico, nos no a duna algun comentario negativo, pero atrobe ta parce cu e mensahe tabata nada mas pa laga tur hende pega soño atrobe y lubida henter e asunto. Te ora cu ta demasiado laat atrobe, anto “ooops… no por mas prome cu eleccion! Ban warda cuatro aña atrobe; e siguiente biaha si, sigur nos ta bay logra..”

Mientras tanto, Aruba ta figura como unico pais den Reino cu no tin un ley riba financiamento di partido politico. Y no ta necesario pa en todo caso e partido den gobierno splica unda nan ta para den e asunto aki, pa esey no mester di palabra. Nan no kier control riba asunto financiero di partido, pasobra esey lo stroba un ripiticion di e campaña manera na 2013. Tempo cu e partido aki a laga su contrincantenan babuca pa loke nan a logra reuni na recurso financiero. Esey a combina efectivamente cu e tradicional abuso di recurso gubernamental (empleado publico, vehiculo, placa) pa duna e partido den gobierno un bentaha solido. No cu esey tabata e unico motibo cu e partido a logra aumenta su presencia den parlamento. Na 2013 ainda tabata posibel pa laga hopi hende kere cu tur e critica tocante e situacion financiero di gobierno tabata nada mas cu ‘envidia di oposicion’.

Menos cu un aña despues aparentemente e oposicion envidioso aki a logra convence Hulanda cu mester interveni pa salba Aruba, por lo menos, esey ta loke nan mes tabatin gana di kere. Nan sa masha bon cu na 2012 ta nan mes colega democrata cristian ministro di Finanza Hulandes Jan Kees de Jager a confronta prome ministro cu e rumbo preocupante cu finanza publico di Aruba tabata bayendo. Nan no kier a scucha y nan a sigui den e rumbo cu nos tur conoce. Den tur e pleito y desorden cu a tuma luga den e añanan despues, realmente no tabatin un momento cu gobierno di Reino publicamente a corda gobierno di Aruba riba su compromiso pa introduci un ley manera e otro paisnan den Reino tin. Esey tabata di comprende tambe, pasobra nan tabatin mester di nos prome ministro pa logra haya e votonan di e islanan independiente cu ta miembro di Nacionnan Uni pa logra haya un asiento den Conseho di Siguridad di ONU.

Nan a logra parcialmente, pero aparentemente e gratitud tabata asina grandi ainda, cu e gana pa atende e asunto aki no ta existi. Con tal cu dia bin problema den e asunto aki, no ta e partido den gobierno so ta di culpa, sino tambe gobierno di Hulanda (y di Reino). Y mientras tanto, kico ta sosodiendo entre e otro partidonan politico? Nos no ta bay discuti nan punto di bista individual den esaki; tin cu ta di acuerdo pa pasa e ley mesora, pero lo ta bon si nan mes ripiti nan posicion den esaki. Nos ta djis constata cu ultimamente e tema aki a disparce di horizonte y talbes lo no bolbe mas tampoco den e campaña actual. Un entidad cu semper tabata trece e tema na mesa, tabata Comision Bon Boluntad, e iniciativa di hopi aña di gremio empresarial y sindicato, apoya durante tur e añanan ey pa varios sector, manera clero, universidad, y cuerpo policial. Lamentablemente, pa prome biaha den casi mita siglo, nan vigilancia y nan yamado na tur partido pa mantene un campaña limpi y honesto lo no t’ey mas. E introduccion di un ley riba financiamento di partido tabata un di e compromisonan permanente pa cual e partidonan tabata firma, cu pareu nan drenta gobierno, nan lo tabatin e obligacion moral pa percura pa introduccion di e ley aki. Por constata, despues di 16 aña di gobernacion solitario, sin un partner di coalicion pa stroba, cu tur a keda debe nos esey.

Di otro banda, nos por comprende completamente cu e partido den gobierno, cu ta e prome yama pa haci algo, no ta dispuesto. No ta tuma un genio pa mira cu eleccion 2017 lo no bay ta manera 2013, tempo cu e partido tabata hopi mas solido cu awe, despues di diferente miembro prominente cu a bandona e partido pa bay den otro iniciativa politico. Den e situacion nobo aki, acceso sin limite na recurso financiero ta importante. Pero nos no ta biba den un ‘bubble’. Mester tuma na cuenta e cantidad enorme di caso den nos region di ayudo di empresa grandi den campaña electoral, di Lula, Chavez, Santos y hopi mas. E caso Odebrecht ta talbes esun mas grandi pero sigur no e unico.

Cu tur e ‘amigonan’ Venezolano di ultimo añanan, di cual felizmente algun a bay para na prizon caba, no ta parce nos necesario di tin mas control riba ken por ta influenciando nos proceso democratico?