– Na luga cu e doño anterior di e refineria – compania di zeta Valero – limpia e asbest manera a palabra, awor, riba nan mesun tereno, rapidamente ta amplia e luga di basha sushi ilegalmente cu containernan yen di material cu ta contene asbest y otro sushi industrial. Aunke ainda ta ilegal, ni gobierno ni husticia no ta interveni.
Esaki nos partner den noticia Ret Karibense a publica.
Minister di Medio ambiente Mike de Meza a priminti cu e lo tene e doño anterior Valero na su palabracion cu lo limpia e asbest. Vice presidente Martin Parrish di e compania Mericano a priminti cu nan lo a soluciona e asunto. Pasobra e tiramento di asfalt na e landfill di e refineria ta ilegal. Esey gobierno tambe ta reconoce; nunca no a duna un permit pa esaki.
Sero di asbest
Cu hopi spanto e habitantenan di e bario pega Lago Heights –cu na 2006 ta hay’e cu bashamento di sushi – ta mira cu ya tin simannan largo cu ta basha mas asbest. Ta nan mes a ripara despues,cu diripiente nan a mira homber bisti na trahe protector blanco ta traha riba e sero di asbest.
Prome nan a kere cu ta limpia nan a bin limpia e sushi. Pero rapidamente e habitantenan pa nan spanto a mira cu ta mas sushi a bin basha acerca y cu e sero di sushi a bira mas halto. Te awe no a informa e habitantenan. E servicionan di gobierno tampoco no tabata na altura. Esaki a sosode numa te ora cu un habitante, Jaap de Vries, a informa nan tocante di e asunto.
Asina por ehempel e Servicio di Inspeccion Tecnico (DTI) no tabata sa nada mientras cu segun e Reglamento di Asbest,cu nan mester supervisa, ta prohibi pa sin permit di minister di Husticia of un ambtenaar cu el a diseña kita of limpia asbest.
50 container di asbest
Sr. De Vries ta manda un carta pa minister di Husticia Arthur Dowers pa para e bashamento di asbest mesora, pero te awe e no a haya un reaccion. Entre tanto DTI a bay wak y nan a yega na e conclusion cu berdad ainda ta dump asbest. Nan tampoco no ta actua y solamente ta constata cu tin cu dera ’50 container di asbest’ ainda.
E containernan di asbest ey, tur no tabata tapa y a para ey añanan largo,cu entre otro mas material cu ta contene asbest di 2012 ora cu Valero tabata basha cas bashi abou.
Lesa mas riba pagina 4 di experiencia di un habitante cu ta biba cerca di e dump di asbest.
