Ultimamente gobierno a tuma nota cu coriente ta bay cu hopi frecuencia y ta preocupa pa e consecuencia cu e interupcion di coriente tin riba nos comunidad. Pa e motibo aki gobierno ta exigi pa realiza un investigacion na Elmar.
Gobierno a pidi Elmar pa duna cuenta di e motibonan dicon coriente ta bay asina frecuente.
Interupcion di coriente no tawata algo cu tabata pasa antes cu asina frecuencia, pero ultimamente ta pasa demasiado frecuente, cu consecuencia cu sector priva ta sufri daño y comunidad en general ta sinti e molester di dje.
Gobierno ta pidi Elmar un estudio di cuanto biaha coriente a bay den ultimo lunanan y kico ta e motibo cu cada biaha coriente a bay y kico ta bay wordo haci pa soluciona e problemanan aki cu ta causa interupcion di coriente cada biaha.
Gobierno ta comprende cu ta un hecho cu falta di mantencion ta un problema. Durante añanan anterior, Elmar no a haya atencion debido di gobierno anterior. Es mas e gobierno anterior a saca hopi placa di Elmar door di pone Elmar paga hopi gasto descabeya di e gobierno anterior.
Esey awor ta un causa grandi cu awe nos tin tanto problema. Sinembargo tin mas cu esey pa cua motibo gobierno a pidi Elmar pa haci un investigacion y duna cuenta riba esaki. Gobierno ta pendiente pa haya e rapport di Elmar pa por tuma un decision.
