Gobierno ta enfrenta… Un situacion compleho

Cu e groundbreaking di e hotel nobo na Sero Colorado ta parce cu definitivamente ta bin un cambio den e paisahe economico di San Nicolas y alrededor. Por bisa cu un empresa di e magnitud aki lo tin bastante impacto den e ambiente empresarial na San Nicolas, pero esey tempo lo bisa.

Ta keda e preocupacion di prome momento, cu nos no tin e forsa laboral pa emplea na momento cu e proyecto keda cla. Di otro banda, si ta berdad cu nos tin un 15.000 Venezolano ta cana rond sin trabao, anto nos mester cuminsa atende e asunto di e banda ey?

En todo caso den e fase di construccion caba e proyecto aki lo percura pa bastante empleo, y sin duda algun pa entrada extra pa gobierno. Y esaki ta algo mas cu bonbini, pasobra lo mester haci e cambio na 2020, di 0,5% di GDP di deficit pa e mesun porcentahe di surplus. Riba papel esey no ta parce ningun problema, segun e cifranan presenta pa gobierno recientemente. Sin embargo, tin algun cifra cu ta lanta un poco preocupacion cerca nos. Por observa cu e cifranan di impuesto directo y indirecto hunto pa 2020 ta menos cu loke a aparece como probable entrada di e mesun categoria na 2019. Presupuesto 2019 tabatin como punto di salida Afl. 1202,2 miyon, mientras den e presentacion di gobierno pa 2020 ta yega na Afl. 1195 miyon. Esey ta implica cu un parti sustancial di e crecemento di presupuesto 2020 compara cu e aña anterior ta bin di entrada cu no ta impuesto. Na 2019 esey tabata Afl. 220,4 miyon y pa otro aña lo ta Afl. 358 miyon. Nos a comprende cu ta tuma como punto di salida un crecemento economico modera, di 1%, pero esaki normalmente lo mester resulta den un crecemento di entrada di impuesto tambe. Nos lo mester warda te cu e detayenan di presupuesto 2020 bira disponible pa por mira di unda e extra entrada ey ta bin; en todo caso e ta un cambio remarcable.

En general ta dificil imagina cu esaki lo ta a base di dividendo di e empresanan liga na gobernacion. Varios di nan, Utilities (WEB, Elmar), AAA NV, Setar NV, entre otro, ta den un fase di inversion grandi cu lo mester bay, por lo menos parcialmente, a costo di e dividendo cu ta entrega na gobierno anualmente. Tin otro aspecto di e asunto di e inversionnan miyonario aki, cu ta montona na sumanan cuantioso: AAA NV mita biyon, Utilities algo similar, incinerator tambe… Nos ta papiando di un suma biyonario cu parcialmente so (AAA) lo ta bin di exterior, a traves di e biahantenan cu ta yuda paga esaki, aunke nos tambe ta biaha y lo contribui. E resto lo ta sali pa gran parti di e cartera di e ciudadano y di comercio y industria… Esey ta haci mas cu urgente pa mira cual di e inversionnan aki ta estrictamente urgente y cual no. Y no ta asina dificil pa deduci cu e inversion den un incinerator, pa cual tin otro solucion, ta esun cu nos mester considera bon, no un biaha, sino dies. Ademas, te awe nos no por scucha di parti di e partido grandi den e coalicion ta pakico nan a firma un acuerdo di gobernacion unda ta propaga e idea di economia ciclico si na e prome ocasion ya nan a entrega…

Mientras tanto, e deliberacion entre gobierno y sindicato a bay un paso mas leu, sin cu tin resultado concreto. No cu nos ta kere cu ta bay tin resultado concreto tampoco, pasobra e sindicatonan ta riba un caminda di guera si nan no ta haya algo awor, cos cu gobierno no por duna pasobra tabata dificil suficiente pa yega na un presupuesto cu ta cumpli cu e meta cu tin. Den e asunto aki no ta cuestion di scoge banda (di gobierno), na su oportunidad nos ta bien capaz pa critica gobierno si tin motibo pa esaki. Pero ta un hecho cu gobierno ta mara na un limite maximo y simplemente no por haci compromiso pa e proximo añanan. Accion di banda di sindicatonan no ta bay cambia e realidad ey. Hasta den e caso – teorico – cu gobierno dicidi di sucumbi pa e sindicatonan, tin e supervision superior di Reino pa coregi esaki. Ta facil pa pinta esaki como un realidad pa gobierno so, pero esey no ta asina, e ta un realidad pa tur esnan envolvi. Si e sindicatonan ta haya cu restructuracion di aparato publico ta un asunto pa gobierno atende, ‘que sea asi’, laga nan atende esaki. Cu e realidad di e cuerpo di empleado publico miho paga den e region aki, y cu e peso mas grandi, awor caba, di e cantidad di salario cu gobierno ta paga, ta bira inevitable pa restructura.

Lo ta bon si pa na e momento ey e sindicatonan no subi baricada pa bringa gobierno, si e cambionan proponi ta razonable. Y pa bo por huzga como sindicato si bo ta bay tuma accion den caso cu e restructuracion no ta razonable, lo bo mester contempla e contenido prome. Si no, despues di gobierno ainda tin hues pa huzga riba tur esaki. E no ta un careda gana caba.