Gobierno ta drecha edificio na grandi…

Diripiente gobierno a cuminsa mustra fuerte y dicidi. Varios asunto cu tin añanan benta un banda ta haya atencion awor. Por ehemplo, e ruina di Bushiri cu tabata parce di no tin ni pariba ni pabao. Awor si decision a cay cu e ruina ta bay, pa traha luga pa un area extra di recreacion, pa poblacion local y pa bishitante. Mirando e desorden na Eagle Beach y Palm Beach riba e dianan cu tin barco crucero grandi aden, talbes no un mal idea. En todo caso miho cu insisti cu mester bin un proyecto hotelero, sin puntra nos mes pakico e ultimo proyecto no a cristalisa. Y de paso nos por puntra nos mes pakico mester a dura tanto pa yega unda nos ta yega, cu eleccion den porta. Si ta asina efectivo e presion di eleccion ta traha, anto nos mester tene eleccion tur aña… Lastima cu nos no ta kere cu esey ta bay ta asina efectivo, sino…

En todo caso lo tin bastante hende cu a keda satisfecho cu asina ta yega un fin na e martirio di e asunto aki. Naturalmente tin esunnan cu ta keda cu e critica cu asina aki tambe a perde e ultimo oportunidad pa trece un hotel cu enseñansa pa hoteleria incorpora, manera Bushiri tabata funciona tempo di su tempo. Esey por ta un argumento, pero di otro banda mester bisa cu no tabatin tampoco un presion fuerte pa yega na un proyecto asina den e edificio aki. Mas bien ta parce cu mayoria di hende a acepta e realidad cu awe tin un carera pa hoteleria incorpora den EPI. Por ta cu un scol incorpora den un hotel existente ta un base y ambiente superior pa train studiante ‘on the spot’, pero manera sa bisa na Spaño:”el que no llora, no mama.”

Pero tabatin mas decision cu a cay. Finalmente a haya un solucion pa e edificionan di ex -JFK y DOW.  Den caso di e ultimo, Aruba Tourism Authority (ATA) mes lo financia esaki. Tur hende contento anto? Gobierno ta haya un edificio renoba, ATA a haya un bunita oficina exactamente unda e accion ta tumando luga, pa loke ta turismo crucero anto. Pero, momento, esaki no ta costa gobierno nada? Sigur? Pasobra segun nos, ATA lo mester hacie di su entradanan. Poniendo prioridad na su gastonan di mercadeo y di organisacion propio, lo mester financia esaki di loke ta resta anto… pero, no ta esey pa un parti mester bay pa gobierno? No ta esey tabata un di e problemanan den e gabinete, cuanto placa ta bay di ATA su surplus pa gobierno y ken ta dicidi esey? Si ATA, den acuerdo cu gobierno, ta uza parti di su surplus pa renoba edificio, gobierno no por cobra esaki na mes momento. Asina ta, completamente gratis e cos aki no lo ta. Lastima cu e parti ey si nan no ta conta.

E caso di ex –JFK tambe ta mustra interesante. Porfin un decision cu lo implica salba un edificio cu ta considera un monumento. Pero ora ta conta cu entusiasmo acerca cu gobierno ta bende e edificio pa mas di 5 miyon florin, e propietario nobo AIB Real Estate NV ta renoba y ta huur esaki cu gobierno pa e mesun suma cu ta paga actualmente den e edificio unda departamento di Enseñansa ta localisa awe. Por ta berdad, pero nos no sa prijs ni di e actual edificio, ni di e nobo, anto ta con nos por husga si ta papia berdad of no. E asunto ta cu na otro pais nan sa cera hende pa mal informa publico, pero na Aruba esey ta un deporte cu cualkier gobierno por practica impunemente, sin ningun consecuencia. Pues si eventualmente otro gobierno algun dia yega na sa kico realmente a sucede, kico nan por haci?

Pero enfin, por sinti cierot satisfaccion den publico cu e asuntonan aki ta bay keda regla. “A keda algo di maha ainda?”, lo ta e pregunta for di seno di gobierno. Wel, pa bisa berdad, si! Ya cu nos ta papia di edificio, nos ta haya falta di un solucion pa cuerpo policial. Tanto cu a papia den ultimo simannan di e condicionnan den cual e cuerpo policial mester trata na duna un prestacion normal, ni di oposicion ni di e propio ministro nos a tende algo tocante e situacion aki. Imagina cu ora un ciudadano tin necesidad di comunica cu polis, e mester laga nan informe prome ta unda e seccion o departamento specifico ey ta localisa. Esey yama eficiencia?

Pa añanan caba henter Aruba sa di e situacion deplorabel den cual e edificio central na Playa ta. Pero asina mes nan ta uza esaki, a pesar cu varios aña pasa a yega na e conclusion cu mester sali prome cu e piso ariba bin abao? Kico nan ta haci eyden ainda? Den henter e asunto aki ta un responsabel tin y esey ta e ministro encarga. Pakico? Pa e simpel hecho cu e mester a move cielo y tera pa logra un luga drechi di traha pa cuerpo policial y nada a sucede.