Ayera un medio di comunicacion local a publica un articulo unda segun e portal, fiscal Wouter Gerretschen ta declara cu tin presion politico di parti di tanto MEP como AVP riba e caso conoci como Avestruz. Prome minister demisionario Evelyn Wever-Croes a declara e noticia falso, mientras Ministerio Publico (OM) no kier a reacciona riba loke e portal a publica, apart di pregunta general di Bon Dia Aruba.
E articulo di e portal ta declara cu e fiscal a bisa cu si laga Benny Sevinger bay den libertad condicional, MEP ‘lo rabia’ y AVP lo ta ‘contento’. Mientrastanto si e fiscal laga e politico di AVP cera, ta AVP lo ta ‘rabia’ y MEP ‘contento’.
Esaki sinembargo segun prome minister demisionario no ta cuadra cu berdad. Den un reaccion riba pregunta di Bon Dia Aruba, Wever-Croes a declara cu e fiscal aki no a bisa loke e texto ta menciona. Ademas, segun e mandatario, e fiscal no ta encarga cu e caso pa mas cu 3 luna. Bon Dia Aruba a corobora esaki tambe cu vocero di Ministerio Publico, Ann Angela, kende a indica cu e fiscal no ta encarga cu e caso mas.
Bon Dia Aruba a pidi Ministerio Publico pa desmenti of confirma e noticia aki, pero vocero Angela a reacciona bisando ‘no, nos no ta bay reacciona’. Mas reaccion Ministerio Publico no kier a duna pasobra segun Angela, ‘no ta nos custumber di reacciona riba loke ta wordo treci pa dilanti den noticieronan’.
