Gobierno ta den fase final di negociacion cu Citgo: Parlamento lo yama Prome Minister pa duna update riba refineria

Parlamentario Endy Croes a bisa cu nan lo bin cu un reunion pa gobierno, y muy specificamente Prome Minister Evelyn Wever-Croes, por duna un update como minister di Energia tocante e terminal y refineria. Esaki despues cu e trahadonan a acepta e pakete di retiro ofreci pa Citgo Aruba Refinery (CAR).

Nan ta wardando un tiki di tempo pa asina haya un bista real di e situacion paden di e refineria. Gobierno ta den e fase final di e negociacion cu Citgo pa haya e yabi bek. Ta mas cu claro – segun e parlamentario en cuestion – cu nan lo bay yama Wever-Croes den un ‘bijeenkomst’. Nan a yega di hacie diferente biaha, tanto na 2018 como na 2019, pa duna un update di e refineria. Y nan lo bay hacie atrobe awor cu nan ta den e fase final di e capitulo aki cu Citgo.

Ademas tin decisionnan cu gobierno prome cu ta tum’e, mester bin parlamento. “Nos ta na espera di esey. Ohala cu e cos aki por a bay mucho mas lihe,” el a declara.

Infrastructura y trahadonan.
Contestando pregunta di Bon Dia Aruba, Croes a bisa cu e situacion di infrastructura di e refineria no ta di ‘canta macamba’.

E ta reconoce cu e situacion ta penoso, ya cu tin trabou cu a wordo haci, pero tin cu no a wordo haci absolutamente. “Ora bo no ta mantene un refineria e ta bay atras,” el a declara.

Den caso aki gobierno di Aruba no tin e placa necesario pa inverti den infrastructura di e refineria, ya cu e ta un inversion miyonario pa drecha y mantene un refineria.

Pa loke ta e situacion di e trahadonan, Croes a compronde cu e compania estatal, Refineria di Aruba (RdA) a tuma 10 pa 15 trahado over solamente pa un luna. E ta un periodo cu RdA a tuma e grupo reduci di trahadonan aki pa atende ora cu un barco ta bin pa abastece nos pais cu combustibel. E ta un operacion cu no por para.

Companianan interesa.
E parlamentario oficialista di e fraccion di MEP a laga sa cu gobierno tin un lista a base di informacion duna pa premier Wever-Croes, cu entre 20 pa 25 compania ta interesa pa opera e terminal di combustibel y/of refineria, of tambe e combinacion di nan dos.

Unabes cu e contract cu CAR ta termina completo, y cu gobierno ta haya e yabi na su man, nan por haci un inspeccion y evaluacion di e infrastructura di e refineria.

“Aworaki Citgo no ta laga bo drenta,” el a bisa. Croes a agrega cu tin cierto multa den contract, caminda cierto hende no mag di papia y tampoco bo no mag deal cu nan.