OSTAD 200 Incubator ta un programa di mentorship y desaroyo empresarial, cual ta yuda esnan cu kier cuminsa (“start-up”), of crece (“scale-up”) nan negoshi cu ideanan innovativo, yega nan meta. Como incentiva, tin un premio maximo di AFL 10,000 pa e ganador di e programa, den ambos categoria di Start-Ups y Scale-Ups.
Aruba ta experimentando un crecemento economico significante, esaki ta trece cune oportunidadnan nobo pa empresarionan. E periodo di expansion economico aki ta habri porta pa desaroyo nobo y innovacion den diferente sectornan. E programa OSTAD 200 Incubator ta un oportunidad perfecto pa capta e energia aki y pa contribui na crea un atmosfera unda ideanan creativo por bira realidad.
“Mi ministerio ta dedica na duna sosten continuo na e industria creativo, agricola comercial, y den tur aspecto di desaroyo sostenibel. Nos ta sostene iniciativanan cu ta yuda nos empresarionan chikito y mediano”, minister Wever a declara. Trahando constantemente pa promove diversificacion economico, cual ta crucial pa fomenta “entrepreneurship”y sostenibilidad den e desaroyo comercial nobo.
Segun un comunicado di gobierno, kier encurasha tur entrepreneur den accion of den curason, pa busca mas informacion di e programa OSTAD 200 Incubator. Esaki ta un oportunidad unico pa bo haya e guia y sosten cu bo mester pa logra bo meta. “Mi ta kere cu e estimulo corecto, bo por como un empresario contribui na nos economia, comunidad y bo propio desaroyo personal”, segun minister Wever.
Bishita www.ostad200.com pa mas informacion. Inscripcion ta habri te cu 3 di juli, 2024.
