Un tema cu tanto prome minister, Evelyn Wever-Croes y tambe minister di finansa y economia, Xiomara Ruiz-Maduro a trata ayera tabatin di haber cu e ley nobo di supervision financiero LAft cu a wordo trata diahuebs ultimo den parlamento. Awor mester warda cual lo ta e reaccion di Hulanda ariba con nan ta mira ‘e asunto aki’, asina e mandatario Ruiz-Maduro a bisa.

Pero e caminda pa gobierno na un finansa publico manehabel ta yena cu reto. P’esey e ta haya fundamental pa nos uza nos wowo y nos tino pa no ‘concentra den diferente bataya, pero pa nos por yega na locual nos kier yega.’ Como minister e ta haya su mes concentra cu wowo y tino ariba e trankilidad y confiansa cu pais Aruba mester pa por yega na su begrotingskamer.

Finansa y begrotingskamer
Pa Ruiz-Maduro como minister di finansa, el a atende cu e aspecto di finansa publico di acuerdo cu e protocol cu nan a yega hunto cu Hulanda. Mientras cu parlamento a atende cu e bataya di e reforma constitucional, cu tambe ta su ‘prerogativo y responsabilidad’ como nos organo legislativo, pa concentra riba e parti aki.

Como minister di finansa e ta bisa cu su punto di bista ta e parti financiero, y riba e veld aki el a keda. Pero pa loke ta e parti constitucional, e ta haya cu Aruba mester sali lihe for di e supervision aki, cu no a resulta manera e mester ta, y miho bay concentra riba nos propio organo begrotingskamer.

Di su banda, e mandatario a informa cu gobierno a yega di manda un carta na Conseho di Minister di Reino pa asina reacciona riba algun punto cu e organo di supervision financiero di Hulanda, CAft a trece dilanti, y cu ‘nos a dresa caba,’ y te hasta nan a yega di splica caba. “Si mester di mas splicacion, nos ta dun’e,” el a bisa.

Sinembargo, e mandatario a indica cu ambos asunto practicamente ta para den e protocol cu gobierno di Aruba a firma cu similar di Hulanda, y nan ta cumpliendo cune. Ya cu e protocol firma na 2018 ta e base pa Aruba haya su autonomia financiero bek, y nan a cuminsa prepara pa esaki.

Di un banda, e memorandum financiero economico cu gobierno a traha, e normanan pa atende cu e deficit presupuestario; y pa asina yega na un presupuesto balansa, y despues genera surplus pa atende cu e debe nacional. E memorandum aki –segun e mandatario en cuestion- ta sirbi como base y guia riba henter e asunto aki.

Den dje a wordo presenta un presupuesto 2019, den cual ta baha e deficit di 149 miyon florin den 2018 pa 25 miyon e aña aki. Pa 2020 ta premira un surplus di maximo 0.5% di GDP. Despues pa 2021 nan ta premira un surplus di minimo 1% di GDP. Sinembargo, Ruiz-Maduro a declara cu stabilidad financiero ta yen di reto, pero tambe di oportunidadnan. Di otro banda, Ruiz-Maduro a bisa cu e creacion di un begrotingskamer tambe ta poni den e protocol menciona, ya cu e meta ta pa Aruba por tin su propio organo di supervision financiero.

Evaluacion
E mandatario tin speransa cu gobierno por logra un rating, si no BBB positivo a lo menos stabiel for di Standard & Poor’s, considerando e BBB + cu ‘negative outlook’ cu Aruba tin actualmente. Segun e mandatario, esaki lo por refleha un recuperacion di e confiansa pa logra e fondonan necesario pa e gobernacion aki. Pero igualmente –segun e minister- e rapport ultimo di IMF (Fondo Monetario Internacional), ta duna gobierno un señal ‘alentador’ cu pais Aruba ta recobra e confiansa financiero.

Diaranson ultimo, IMF a bin cu su rapport oficial cu a wordo divulga y cu -segun e mandatario- ta mustra un ‘perspectiva economico cu ta generalmente positivo.’ IMF a mustra un pronostico di crecemento real di nos economia di 0.7%, pero nominal di 2.4%. El a splica cu e diferencia ta cu real ta ora e ta wordo corigi cu locual ta inflacion. A pesar di e cifranan aki, gobierno kier mantene pa e parti di presupuesto un linea conservativo of prudente di 1% di desaroyo economico pa asina mantene nan gasto conforme loke economia ta crece.