ORANJESTAD – Gobierno di Aruba ta preocupa cu e situacion cu Venezuela ta confrontando na e momentonan aki y esaki tin atencion di gobierno desde cu e problemanan di nos pais bisiña a cuminsa escala.
Prome Minister Evelyn Wever-Croes a duna di conoce cu e gobierno ta siguiendo e desaroyonan di cerca y nos ta den estado di alerta pa cualkier eventualidad cu por tuma luga. Aki tin varios puntonan pa cua Aruba ta den estado di alerta.
-Gobierno na e momentonan aki ta mas alerta y atento riba nos fronteranan.
-Nos ta den estado di alerta riba e impacto internacional y e posicion di Hulanda den e asuntonan aki.
-E vuelonan entre Aruba y Venezuela tambe ta un motibo di preocupacion cu ta pone nos den estado di alerta. Nos no kier e situacion na unda fronteranan mester wordo cera y Arubanonan keda pega na Venezuela. Prome minister a indica cu e conseho di biahe di Reino ta pa no bay Venezuela si no tin nada di haci eynan. Na e momentonan aki, Venezuela no ta un luga pa pasa vakantie. Ainda no tin prohibicion pero e conseho di Reino ta pa evita di bay Venezuela.
-E di cuarto punto preocupante ta e tema di evacuacion di nos hendenan. Esaki ta algo cu Aruba so no por haci. Esaki ta un plan cu mester wordo haci riba tereno di Reino cu lo tuma su tempo. Pa e motibo aki tambe, desde aña pasa a haci apelacion na tur esunnan cu ta biaha pa Venezuela, pa nan registra na embahada Hulandes na Caracas. Specialmente Arubanonan cu ta biba na Venezuela, pa nan registra na e embahada pa si acaso e situacion yega asina leu cu mester evacua, nos hendenan ta riba e lista registra.
Prome Minister a enfatisa cu loke cu ta sosodiendo na Venezuela ta pone cu tur luz di alerta ta cende poniendo Aruba den estado di alerta siendo nos un pais hopi cerca di Venezuela.
