Aruba a uni oficialmente na e metanan di e Sustainable Development Goals di Nacionnan Uni y ayera, riba e Dia Mundial di SDG, Gobierno di Aruba den presencia di e comision SDG di Aruba a efectua e ceremonia di hisamento di bandera pa conmemora e dia y tambe mustra e compromiso di Aruba cu e SDG’s.
Prome Minister Evelyn Wever Croes na e ocasion a bisa cu mundo henter a celebra e di seis aniversario di e metanan di SDG’s, cu ta metanan di desaroyo sostenibel. Nan ta consisti di cinco pilar, cu ta e ser humano, planeta, prosperidad, paz y colaboracion.
“Nan ta forma un compas, nan ta duna guia,un direccion pa yega na un comunidad mas resiliente.”
Segun mr. Wever Croes , e SDG’s ta importante pa Aruba. Como pais chikito tin reto, pero e ta keda un prioridad. “Awor mas cu nunca cu mundo henter ta confrontando reto pa motibo di e pandemia y e desigualdad a magnifica, cu esnan mas vulnerable pa keda desproporcionalmente afecta.”
Pero asina mes, mundo y Gobierno di Aruba tambe ta keda mes determina pa SDG’s brinda paz, prosperidad y un planeta sano, mr. Wever Croes a bisa.
“ Gobierno di Aruba ta mira e SDGnan como guia pa yega na un nivel halto di prosperidad, unda paz ta reina pa un y tur, y na unda ta respeta nos naturalesa. Mescos cu mundo ta celebra SDG’s, Aruba su respuesta na e retonan nos dilanti mester ta uno di union, unda ta invita henter comunidad, sector priva, sector publico, academiconan, ngo’s pa tur hunto enfoca y desaroya solucionnan innovativo y sostenibel.” Pa por realisa e metanan aki ta rekeri esfuerso di henter comunidad, no di Gobierno so, Prome Minister a enfatisa. “Mester demostra esaki cu accionnan decisivo cu por yuda crea un futuro resiliente pa e isla. Bienestar ta depende di otro. Aruba mester di nos tur,” tabata e palabranan di Prome Minister Evelyn Wever Croes.
Despues di su discurso a hisa e bandera di SDG, den presencia di miembronan di su gabinete ademas di e lider di e Oficina di SDG na Aruba, Jocelyne Croes, MSc, hunto cu hefenan di departamentonan cu tin e tarea pa percura cu maneho di Pais Aruba ta de acuerdo cu e compromiso cera cu Nacionnan Uni, esta cu mester tene cuenta cu tur e 17 compromisonan pa un desaroyo sostenibel.
