Gobierno ta cauteloso pa kita permiso di establecimento comercial

Minister di Economia, Richard Arends ta declara na Bon Dia Aruba cu ultimo tempo nan ta haciendo hopi control riba e companianan cu ta haci mal practica comercial. Of esunnan cu no ta cumpliendo cu e servicio cu nan a ofrece na nan clientenan of consumidor.

Intervencion
Den e tipo di control aki diferente instancia gubernamental ta participa. No solamente departamento di Asunto Economico, sino instancianan cu tin di haber cu salud publico y sanidad, te hasta servicio di impuesto. Tambe polis ya cu cada negoshi tin diferente tipo di permiso.

E ta sali fei di punto di bista cu nan ta percura pa cada establecimento comercial mantene nan permiso. Pero esaki no ta kita cu tambe nan ta aplica sancion . Inicialmente e por ta un sancion pa coregi. Manera departamento di Asunto Economico ta duna un empresa tempo pa coregi nan mal practica. “Logicamente gobierno no t’ey pa destrui comercio”, e minister ta bisa.

Cauteloso
Punto di bista di gobierno ta pa ta cauteloso cu e intervencion of sancion no ta stroba mercado. Minster Arends kier recorda cu gobierno a introduci recientemente un maneho di establecimento di negoshi nobo, unda nan a limita e tipo di actividad comercial den areanan residencial. Tambe gobierno a prohibi establecimento di supermercado. Pero e ta consciente cu un moratorio manera riba supermercado ta un intervencion hopi grandi di gobierno den e dinamica di e mercado.

Minister Arends ta kere personalmente cu e mercado riba su mes ta haci su trabou pa mantene su mes den balans. Pero un dado momento mester compronde cu economia di un pais ta depende di bo actividad economico, infrastructura y tambe calidad di bida di e hendenan. Na momento cu bo actividad economico ta cuminsa afecta e calidad di bida di e hendenan, e ta haya cu e ta un momento legitimo pa gobierno por interveni den mercado y esey a sosode.

Proteccion
Segun minister Arends, e motibo pa kita un licencia di operacion di negoshi mester ta uno hopi extremo. Kiermen despues cu a duna boet caba, etc.. Ya den pasado e departamento concerni a yega di revoca licencia di establecimento. Pero nan ta prefera di duna oportunidad na e empresa pa cambia pa ehempel e manera di haci negoshi. Enbes di bay directamente na revoca e licencia, manera a sosode recientemente cu e compania di telecomunicacion MIO.  E sancion di departamento di Sanidad y Inspeccion di Alimento ta diferente. Nan si ta cera establecimentonan cu tin di haber restaurant, etc. hunto cu polis, ora cu nan ta wak un mal maneho of manipulacion di cuminda of bebida.
Pa nan por eherce un miho control y mehora e calidad di nos economia, mester existi un colaboracion estrecho entre consumido y gobierno, e minister tambe ta bisa.

E ley di establecimento di negoshi ta leynan cu a wordo traha den decadanan di añanan 70 y 80. Nan ta leynan cu nan solo meta ta pa protege e inversionista of comerciante local . Pero e ley aki durante añanan a wordo adapta di diferente manera cu ta bira dificil te hasta pa e local mes. Igualmente e ley tin hopi buraco cu companianan ta wordo probecha di e situacion aki. E mandatario a indica cu nan ta den un proceso continuo di simplifica e ley aki y duna mas transparencia pa mehora e parti di establecimento di negoshi.

Nan como gobierno tin diferente instancia entre nan Dienst Huur & Consumenten Zaken caminda e consumido por entrega keho di forma anonimo. Nan por ta diferente tipo di keho ya sea pa calidad y garantia di cierto producto/servicio. Pero tambe pa companianan cu no ta cumpli cu nan obligacion di pago di belasting y obligacion social manera primanan di AZV, SVB, etc..

“Yamada na e programanan riba radio no ta soluciona nada”, e minister kier enfatisa. Pasobra segun e, tin departamentonan cu por atende cu e kehonan aki y actua.