Manera Bon Dia Aruba a informa, dia 6 di december ultimo hues di LAR a duna veredicto den e caso entama pa activista Anouk Balentina, na unda a revoca e hindervergunning cu a otorga pa e incinerator na Parkietenbos. Durante tratamento di presupuesto, contestando pregunta di parlamentarionan, Minister Ursell Arends a duna un actualisacion ariba e situacion di incinerator.
Arends a splica cu desde september ultimo e incinerator no tabata den funcion. Loke gobierno a haci ta crea depositonan, a tuma medidanan temporal pa asina surpasa e tempo y mientras tanto ta bay haci inversion den incinerator pa esaki por cuminsa opera back.
E mandatario a indica cu desde cu hues a dicta sentencia pa revoca e hindervergunning, gobierno a extende e medidanan cu a implementa temporalmente. El a sigui splica cu loke nan ta bay traha riba dje aworaki ta e reaplicacion pa e hindervergunning pa asina e incinerator por ta operacional back, pa por procesa desperdicio medico y carcas di bestia morto.
Minister Arends a agrega cu pa proximo dos pa tres aña mientras cu e RWZI nobo no ta cla, e incinerator mester procesa tambe e sludge. Pero unabes cu e RWZI nobo keda cla, eynan mes ta bay bin un ‘biodigestor’ cu ta bay procesa e sludge y crea coriente cu ta bay ta disponible pa operacion di e RWZI mes.
“Nos ta den proceso aki aworaki y nos tin deposito temporal cu ta sigur pa tur hende y cu no ta den cercania di e habitantenan. Esey ta e medidanan temporal cu nos a tuma tanto pa desperdicio medico y carcasnan ta bezig ta wordo dera,” el a subraya.
E mandatario a enfatisa cu bao di su mandato no ta bay bolbe kima den aire liber mas. “Un cos mi ta sigura ta cu nos no ta bay kima mas den aire liber, esey sigur no lo bay pasa mas.”
