Den cuadro di eleccion venidero un di e preguntanan cu ta surgi ta: Ki momento gobierno na mando ta declara su mes demisionario den cuadro di eleccion venidero? Vice-presidente di Parlamento a laga sa cu e topico aki ta uno cu ta regla den ley caba. “No ta parlamento ta bay fih’e”, el a declara na e matutino aki.
Segun e vice-presidente di parlamento, un gobierno ta wordo declara demisionario solamente pa dos motibo: Despues di eleccion of tambe ora cu gobierno ta cay pa motibo di falta di sosten di e mayoria den parlamento.
Parlamento como organo di control di gobierno no ta determina ki ora gobierno mester declara su mes demisionario prome cu eleccion. Tampoco den ley no ta stipula un termino fiho caminda gobierno mester declara su mes demisionario prome cu pueblo votado ta determina su destino.
Gobierno y decision
Hasta den periodo di eleccion, gobierno no por abstene su mes di tuma cierto decision. Si cualkier calamidad sosode rond of despues di eleccion, e gobierno demisionario mester actua. Aunke demisionario despues di eleccion, gobierno tin autoridad pa atende cualkier calamidad y e no ta kere cu niun miembro di parlamento lo ta contra.
Tambe el a indica cu continuacion di gobierno den cuadro di eleccion venidero ta exigi actuacion. Tin proceso cu ta tumando luga pa basta tempo pasa, pero cu den e periodo aki ta wordo concretisa. El a cita como ehempel si ta e caso e nombramento di un Procurador General nobo, e ta algo cu dificilmente bo por want’e, ya cu e ta un proceso largo y bo tin cu busca y selecta un hende. Na momento cu e ta surgi, bo no mester tarda mas cu esaki. Di otro banda tin cierto iniciativanan completamente nobo cu si tin cu warda.
Decencia politico y demisionario
Aunke no ta determina pa ley cu e gobierno mester keda demisionario prome cu eleccion pa evita entre otro patronahe politico of haci campaña a cambio di fabor politico, e ta haya cu e “decencia politico” mester prevalece. E ley tambe ta bisa cu gobierno no ta bay tuma decisionnan grandi pa mara e siguiente gobierno.
E reglanan pa stipula con gobierno ta sigui fungi y te ki dia por firma cierto documento, kico mag of no mag, esaki ta bon regla. Te hasta pa parlamento e principio aki di “decencia politico” ta conta. Decencia politico kiermen den un pais habri y democratico cu tin su proceso di eleccion pa tene cuenta cu esaki. “Bo no ta rek bo poder over di eleccion”, el a indica.
Parlamento no ta bira demisionario prome, ni tampoco despues di eleccion. El a indica cu si pa ehempel parlamento tin un fraccion cu ta mayoria y nan partido no gana eleccion, nan por tuma decision, pero tog nan no ta hacie pa decencia politico.
Den caso di tratamento di presupuesto esaki si por sosode. Ta asina cu den e caso cu nan mester trata por ehempel presupuesto 2018 y mester tuma un decision riba e presupuesto e parlamento existente por trat’e y aprob’e na tempo. Esaki ta posibel si e ta drenta na vigor 1 di september, prome cu eleccion. E otro opcion ta cu parlamento ta pas’e pa asina e gobierno nobo por trat’e na october venidero, ya cu e presupuesto nobo mester ta aproba pa 1 di december.
Kiermen un gobierno y un parlamento nobo lo por tuma e decision pero esaki no ta kita cu e gobierno y e parlamento actual por cuminsa cu e proceso. “Parlamento existente tin cu tuma decision”, el a bisa. Solamente cada biaha parlamento den su totalidad (oficialista y oposicion) lo evalua kico ta bon pa trata of no, durante e periodo prome cu eleccion. Tin leynan cu sigur e ta considera cu tur kier trata y cu tur parlamentario lo ta di acuerdo y cu no tin motibo pa pospone.
Suicidio politico
Sr. Herdé tabata categorico pa bisa cu niun parlamento ta bay aproba cosnan cu ta totalmente fei sla. “Lo ta suicidio politico si e ta haci esey”. Bon Dia Aruba a puntr’e si lo ta un suicidio politico den cuadro di eleccion venidero si pa ehempel gobierno ta sigui tuma hendenan den aparato gubernamental of firma contractonan grandi? “Si!. Ami ta considera cu bo no ta tuma decisionnan grandi cu ta mara un gobierno”.
Sinembargo hopi biaha gobierno como organo ehecutivo por haci hopi cos cu no mester di aprobacion di parlamento. El a bisa cu den pasado nan por wak pa ehempel cu e minister di salubridad a firma contractnan pa extende e huurmento di edificionan cu famia Croes tabata huur cu gobierno anterior. Esaki contra ley y sin consulta cu su otro coleganan minister. “Te awe e ta wanta critica p’esey”, el a bisa.
E ta haya un decision asina lo ta un suicidio politico te hasta pa un partido cu ta perde eleccion. E ta ripara cu esey tabata e caso na 2009 cu nan tabatin leynan crucial y nan a pas’e pa e siguiente gobierno. El a bisa cu ora nan drenta na october di e aña ey, e prome ley cu nan a pasa tabata uno di busca un fiansa di 100 miyon dollar cu gobierno anterior di MEP a laga atras pa atende entre otro cu e fondo di pensioen. Ta un ley cu nan no a trata prome tampoco durante e periodo cu nan tabata demisionario, pasobra e tabata un ley grandi. Tambe asunto di pensioen cu nan no kier a atende y cu segun sr. Herdé a conduci na problemanan.
El a splica cu despues di eleccion tin un periodo cortico pa e formado of informado forma un gobierno nobo. E ta un periodo caminda denter di 30 dia parlamento nobo ta sinta. Tambe por surgi situacion cu den un periodo di 30 dia eventualmente e gobierno nobo no ta forma ainda.
