Prome Minister di Aruba, Evelyn Wever-Croes a yega di premira cu na caminda cu gobierno di Aruba mester cana pa haya e fondo necesario pa atende cu emergencia economico, nan lo topa dificultad pa purba desvia nan di nan metanan. Un di nan ta e posicion di Hulanda. Sinembargo e ta haya cu e momento aki no ta uno ‘pa yora malay of haci dificil.”
Diasabra ultimo, minister presidente a yega di informa cu ainda gobiernono a bin cla cu Hulanda y nan ta den negociacion. Gobierno di Hulanda kier wak e plannan cu gabinete Wever-Croes a traha, y con nan ta hinca den otro.
Aworaki gobierno su meta ta di por yega na e fondonan pa tin e recursonan economico pa atende cu e crisis cu Coronavirus/Covid-19 a ocasiona na Aruba. Te fin di siman ultimo, gobierno di Aruba no tabatin un claridad riba unda e placa di 1.3 biyon florin mester bini pa nan por canalisa nan ayudonan na esunnan cu mester di dje. El a bisa cu den reino Hulandes, e situacion di Aruba no ta uno diferente na esun di Corsou y St. Maarten. “Nos ta hunto den e mesun boto…” el a bisa.
Cada un di e paisnan aki a presenta algun plan economico di alivio pa nan comunidad, y Aruba tambe a yega di haci’e. Pero te ainda e problema ta sinta riba e acceso di fondo pa cubri esey, ya cu nan no tin’e ainda.
E situacion di Aruba pa logra e fondo aki ta diferente na Corsou, St. Maarten y BES. Minister Presidente a informa cu pa Aruba, gobierno ta canando dos trayecto. Un di e trayecto ta cu pais Aruba mes ta buscado placa pa presta na Merca. Den esaki nan a haya aprobacion di Parlamento y di Conseho di Minister di Reino.
Actualmente minister di Finanzas, Xiomara Maduro ta constantemente bezig pa logra e prestamo aki na New York. Nan ta buscado acceso na e fiansa aki pa asina alomenos den e prome luna di e crisis aki, gobierno por atende cu diferente reto socioeconomico di nos pais.
E posibilidad aki no ta facil, ya cu e entidad di credito kier sa con Aruba ta bay recupera despues di e crisis aki. Pero tambe nan kier tende kico Hulanda ta bay haci pa yuda nos pais. “Eseynan ta preguntanan cu no ta facil pa contesta,” el a declara. Riba kico ta bay pasa despues, diasabra ultimo premier Wever-Croes a reitera cu keto bay su gobierno ta den negociacion cu Hulanda. Gobierno a presenta su plan y nan ta na spera di un opinion di Hulanda riba nan plannan pronto, eventualmente e siman aki.
