Gobierno ta bay bisa prensa…Kico ta etica…?

Recientemente ministro encarga cu entre otro telecomunicacion a vocifera e intencion di bin cu cambio di ley pa por actua mihor contra excesonan cu e ta señala den prensa. Den esaki el a referi na e menazanan cu a sali recientemente via algun medio di comunicacion, cu tabata dirigi contra cierto ministronan. Como agravante e ta mira cu no tabatin obhecion aparente di parti di e medionan mes. Segun e mandatario, libertad no ta implica ‘free for all’ y cu laga e asunto asina por yega na fomenta odio den pueblo, loke ta sumamente peligroso. Como cu e mandatario ta haya cu e actual ley di telecomunicacion ta anticua, di 1908, e ta kere cu mester di instrumento nobo pa duna e departamento encarga cu supervision mas forza di accion contra loke e ta yama “e desaroyo preocupante aki”. Un di e instrumentonan lo ta un sistema di ‘delay’ pa radioemisora, cu ta duna e operador 6 seconde pa interveni si a papia cos ofensivo cu no mester bay den aire. Ademas mester registra nomber y number di telefon di tur e yamadanan ricibi, como tambe dia y ora di transmision di e programa.

Esey no ta tur pasobra ta e intencion tambe pa bin cu un codigo publicitario y codigo periodistico y lo institui un conseho di medio (mediaraad) pa “conseha minister, prensa, informa y mantene su mes al dia cu e desaroyonan internacional, elabora un codigo publicitario y codigo di conducta periodistico y atende keho over mensahenan publicitario y conducta periodistico.” Tur esaki lo mester conduci na un nivel mas eleva di periodismo na Aruba.

Esaki ta motibo pa aplaudi e intencion aki? Nos ta kere cu no. Na promer lugar, no ta ultimamente e deseo gubernamental a bin dilanti pa haya mas grip riba prensa. Pa varios aña caba e idea di un ‘mediaraad’ ta haci su ronda, sin cu a yega na concretiza, loke nos no ta lamenta. Y pakico no? Pasobra e remedi por resulta mas dañino cu e mal mes. Ta berdad cu tin ora ta sucede cosnan cu no ta cuadra cu ley, tampoco cu e ley existente, cu e ministro ta yama anticua. Anticua? E ley actual ta contene medida apropia pa ora un persona menaza un otro via un medio di comunicacion. E departamento concerni por haci su trabao, e ministro(nan) por a entrega denuncia y Ministerio Publico por actua sin warda riba denuncia. Nada di esey a tuma lugar. Es decir, no a usa e instrumentonan pa accion posterior cu ta existi caba. Anto kico bo ta keha?

Ta parce cu mas bien tabata warda un ocasion asina pa bin cu algo cu politiconan tabata desea hopi tempo caba, y ta motibo pa bira cauteloso. Pa cuminza, kico nos Constitucion ta bisa den esaki? Articulo I.12 inciso 2 ta bisa: “ Por medio di ordenanza nacional (landsverordening) por somete transmision di radio o television na permiso, den interes di un uso responsable di ‘ether’ o den interes di un emisora pluriforme. No tin supervision di antemano riba contenido di un transmision di radio o television.” Esaki ta implica cu supervision di antemano no ta permiti.

Pero, lo tin e argumento cu e ley lo bisa cu ta e explotador/empresario mes di radio o television mester hiba e control, no gobierno. Pero ta keda un hecho cu gobierno via ley ta obliga e empresario hiba control na su nomber… Y esaki, manera bisa caba, mientras tin tur tipo di medida cu por tuma posteriormente y no ta haci uso di nan, pero sí ta keha cu “cos ta bay for di man”. Y no bisa cu ta imposible pa actua. Un ehemplo: varios aña pasa durante campaña electoral un radioemisora liga na un partido politico – cu tabata na poder e tempo ey – a vocifera menasa cu por a interpreta como un yamado contra orden publico (“opruiing”). E Comision Bon Boluntad di e tempo ey a denuncia esaki y Ministerio Publico a manda yama e doño di e emisora y a atende e asunto cune, y el a stop di inmediato cu su menasanan. Pues gobierno, di cualkier color, bay usa bo instrumentonan actual di actuacion represivo, promer cu purba bay den direccion di accion cu ta en pugna cu Constitucion.

Ademas, e asunto no ta keda na accion contra radio y television, pero ta contempla bin tambe cu un conseho di medio, algo cu por ta concerni henter prensa. Aki tambe mester bisa cu nos ta mira cu preocupacion cualkier iniciativa, y pakico? Pasobra te awor tur instrumento di control cu supuestamente mester ta neutral, ta para bira instrumento di opresion na man di e gobierno di turno. Ta masha bunita pa bin cu un conseho asina, unda posiblemente ta duna prensa mes tambe presencia, y kico nos lo mira finalmente? Cu e gobierno di turno ta pone su pionnan den e conseho y ta usa esaki como arma contra e prensa cu no ta na su banda. Nos a mira e cos aki sucede tanto biaha caba, y cada cambio di gobierno ta hiba nos mas leu di unda nos mester ta, pasobra no ta haci un intento pa equipa e consehonan aki cu hende neutral, al contrario. Nos mester un prensa responsable, cu ta actua cu etica y respet, pero pa gobierno bay sirbi di juez den e tipo di asunto aki, no ta bay beneficia e pais aki.