For di sala di Conseho di Minister di Cocolishi, prome minister Mike Eman a anuncia ayera un serie di aumento di toeslag y reduccion di tarifa. Ta trata aki di decisionnan cu a wordo tuma ayera tardi den Conseho di Minister y cu di biaha lo forma parti di e ultimo notanan di cambio pa cu presupuesto 2017. Segun prome minister Eman ta trata aki di ‘cambionan cu ta refleho di e maneho cu nos gobierno a stipula pa aña 2017 y e añanan nos dilanti.’
Durante e anuncio, na unda porcierto solamente un medio di comunicacion tabata presente, Eman a argumenta cu gobierno a pone hopi enfasis riba inversion pa stimula e economia, pero tambe riba inversion pa mehora y fortifica e poder di compra di e comunidad. E ahustenan ta basta substancial. Entrante prome di januari ta aumenta pensioen cu 2,3%. Aña nobo ta habri tambe cu reduccion di tarifanan di coriente. 15% pa residencianan y 5% pa negoshi. Tambe lo aumenta Bijstand. E uitkering normativo ta bay di 407 florin pa 450 florin. E subsidio pa cada miembro di famia ta bay di 175 florin pa 200 florin. E schoolkinderentoeslag pa cada mucha den un famia di menos recurso ta bay di 200 pa 250 florin. E suma cu famianan ta haya un biaha pa aña pa cada yiu cu ta bay scol ta subi di 120 florin pa 220 florin. Prome minister Eman a duna di conoce di ta spera cu otro aña e aumentonan lo ta mas grandi ainda, mirando reapertura di e refineria. Awe minister di Finanzas Angel Bermudez lo presenta e ultimo notanan di cambio na parlamento di Aruba.
E ahustenan cu a haya e nomber ‘progreso comparti’ no ta solamente pa famianan di menos recurso. Recien graduadonan tambe por conta riba bentahanan nobo pa loke ta pago di nan prestamo di estudio. Anteriormente, gobierno ya caba a introduci un reduccion di 30% di debe pa studiantenan cu despues di caba nan estudio a regresa Aruba dentro di tres aña. E mesun reduccion ta conta pa esnan cu paga nan debe den un solo bes. “Awe den Conseho di Minister a dicidi pa subi e rebaho di 30% na 35% cu ta encera un suma considerabel”, asina e prome minister a anuncia. Minister di Finanzas ya caba a anuncia cu ora di paga studielening, por reduci e suma henter – te un maximo di 10 mil florin – di e sumadi belasting, y no djis e interes so manera antes tabata e caso. Finalmente gobierno a dicidi pa socialisa e pago cu ta wordo haci pa pikimento di sushi. E suma mensual di 25 florin ta bira 10 florin pa famianan cu tin un entrada di bou 2500 pa luna.
