“Si bo mira rond, otro paisnan a crea un economia bastante impresionante riba esaki. Asina leu nos no ta ainda, pero si e pensamentonan ta bay den e direccion ey”, prome minister Evelyn Wever-Croes ta bisa. Ayera durante reunion den parlamento pa trata tema di Citgo, parlamentario Ricardo Croes (RED) a lansa e pregunta na nos prome minister si tin plan pa reemplasa entradanan cu mester bin for di Citgo. Y si gobierno ta haciendo investigacion pa cu Hemp pa reemplasa entradanan di Citgo. Premier Evelyn Wever-Croes (MEP) ta bisa cu na momentonan aki gobierno a saca e projeccion di crecemento economico cu e refineria mester a contribui for di e presupuesto. Minister Wever-Croes ta bisa cu nan ta trahando riba un presupuesto sin e parti akinan awor, pues na otro manera nan lo tin cu percura pa cubri e gastonan cu gobierno tin.
Pero naturalmente tin un plan economico cu lo wordo finalisa den e dianan aki segun gobierno ta laga sa pa asina bay cuminsa desaroya otro pilarnan economico importante. Pa loke ta trata e tema di Hemp, gobierno ta bisa cu e no ta un estudio riba su mes na momentonan aki pero si tin un comision cu nan a cuminsa delibera con lo atende cu e tema di legalisa uzo medicinal di Cannabis na Aruba.
Anto den e cuadro eynan, e comision ta bezig ta brainstorm anto e ora a bin e punto pa dilanti cu si lo legalisa uzo medicinal pa alivia dolor, problema di epilepsia y varios otro problema di salud. Anto e ora lo ta un oportunidad cu eigenlijk bo ta perde si bay importa e productonan y dicon no ta haci di dje un pilar economico. Bao di condicionnan naturalmente segun gobierno, pa Aruba cuminsa cultiva akinan mes.
