Desde luna di mei diferente doño di centronan di cuido di mucha a anuncia na comunidad cu nan lo ta introduciendo un aumento di prijs di nan servicio debi na cu nan mester cumpli cu exigencianan di ley di kinderopvang y cu esey ta trece gastonan extra pa nan.

Durante su conferencia di prensa dialuna mainta, minister di Husticia y Asuntonan Social Rocco Tjon a ricibi pregunta tocante posibilidad di subsidio pa e centronan di cuido aki pa yuda cubri e aumento di gastonan cu nan ta referi na dje of pa e mayor- of famianan cu mester manda nan yiu(nan) crèche pa yuda nan cu e gasto aki.

E mandatario a splica den su contesta cu den full e proceso cu gobierno a encamina pa introduci e ley di kinderopvang semper nan a involucra centronan mes y tabatin diferente anochi di informacion caminda a splica tur cos.

El a indica cu gobierno su punto di salida semper tabata cu esaki lo bay wordo introduci den fase pa e peso no mester cay riba e centronan aki.

Minister Tjon a remarca cu awor e ta keda na cada centro si nan kier aumenta prijs of no despues di e introduccion di e ley di kinderopvang. “Mi sa di hopi centro cu no ta bay aumenta prijs pasobra nan sa cu nan por sigui draai na e forma cu e ta bay aworaki, pero e ta keda escogencia di cada centro si nan kier haci esey y e ta keda escogencia di cada mayor si nan kier manda nan yiu na un centro cu a hisa prijs of no,” el a subraya.

El a sigui splica cu gobierno a crea espacio economico cu por yuda diferente grupo den comunidad manera por ehemplo ambtenaarnan cu a haya nan indexering, esnan cu ta traha den fundacion cu tambe a haya indexering y aumento di bijstand pa personanan cu limitacion, entre otro.

E mandatario a indica cu nan ta, entre otro den cuadro di e landspakket, pero tambe for di su ministerio, analisando tambe ki tipo di medidanan nan por introduci cu ta baha costo y cu alabes lo subi entrada.

Un di e medidanan aki cu nan ta evaluando, el a señala, ta pa introduci un subsidio pa famianan cu tin muchanan cu ta bay un crèche. “E ta un analisis pa evalua si ta bay introduci esaki, y si esey ta e caso na ki forma ta bay introduci’e. Tin diferente pais cu conoce esaki, nan tin e a traves di diferente metodonan y nos ta analisando awo kico lo ta mas factibel pa e situacion aki,” el a enfatisa.

E ley di kinderopvang tin diferente rekisito cu e centronan di cuido mester cumpli cune. E doñonan di centronan di cuido a resalta, durante un conferencia di prensa den luna di mei ora cu nan a anuncia e aumento di prijs, cu pa por cumpli cu e diferente rekisitonan cu ley ta rekeri ta costa cen, entre otro pa infrastructura, inverti den material, paga extra personal y pa e motibo aki nan a tuma e decision cu nan tin cu aumenta e suma nan prijsnan.

E motibo mayor di aumento di prijs ta debi na e ratio cu ta para den ley. Ratio ta un cantidad specifico di mucha segun edad cu por ser cuida door di 1 leidster, e ratio a ser implementa pa por brinda un miho calidad di cuido pa e muchanan den un grupo mas chikito di mucha.

E ratio ta lo siguiente: 0-1 aña 6 baby pa leidster; 1-2 aña 10 mucha pa leidster; 2-3 aña 12 mucha pa leidster; 3-4 aña 13 mucha pa leidster; 4-6 aña 14 mucha pa leidster; 6-12aña 16 mucha pa leidster.

Pero e centronan di cuido, nunca a traha cu ratio y cada un centro di cuido tin nan cantidad di mucha cu ta cubri e gastonan di e scol pa e por sigui opera.

Awor, e ley ta exigi pa nan traha cu ratio, cu ta un cantidad specifico y nan a indica cu nan ta bay tin cu haci algun cambio pa por cumpli esaki, entre otro, busca extra personal pa cubri e extra muchanan cu normalmente nan ta traha cune y manera el a menciona, tur esaki ta costa nan scol hopi placa, por ehemplo, salario pa e leidster, belasting, SVb.

Nan a pone como opcion, traha cu e cantidad di mucha cu ta ser exigi den ley cual ta menos mucha y e consecuencia ta cu nan como crèchenan no lo por cubri nan gastonan mas mirando cu e entrada lo ta menos y na final mester cera nan crèche y no por sigui brinda cuido pa e muchanan.

Di dos opcion ta pa traha cu e cantidad cu ley ta exigi cual ta menos mucha cu consecuencia cu nan entrada lo bira menos y e prijsnan di cuido mester subi pa nan por cubri nan gastonan mirando cu nan mester manda algun mucha cas pa por traha cu e cantidad exigi.

Di tres opcion ta cu ta traha cu e cantidad di mucha cu ley ta exigi y mester busca extra leidster pa cubri e muchanan cu ta surpasa e cantidad di exigencia cu consecuencia cu nan mester paga un salario extra, belasting y SVb y e prijsnan di cuido mester subi pa nan por cubri e gastonan extra.

Mirando e opcionnan, un grupo di centronan di cuido, no tur, a anuncia cu nan lo ta aumentando prijs pa nan servicio entrante 1 di augustus.

E tempo ey e doñonan di centronan di cuido ya caba a trece dilanti cu como solucion cu Aruba por implementa subsidio pa mayornan manera ta sucede na Hulanda, unda cu esey ta un ayudo grandi pa mayornan pa por cubri e suma mensual di centro di cuido pa nan yiu.