Den un carta manda pa Departamento di Recursonan Humano, Gobierno ta adverti empleadonan publico cu a base di ley no ta paga salario pa e oranan no traha pa via di accion sindical.
Den e carta, cual Bon Dia Aruba a ricibi pa mira, tambe ta indica cu tuma vacacion por solamente di antemano, incluyendo aprobacion di superior. “No work no pay” ta existi den LMA tambe.
Mientras cu ta reconoce cu e trahadornan tin derecho pa bay den accion, incluyendo welga, tin e condicion cu mester anuncia esaki di antemano. Den caso cu no hacie, ta papia di ausencia na trabao sin splicacion of permiso.
Den e carta ta indica cu a manda e informacion aki riba peticion di prome minister, Evelyn Wever-Croes. Esaki mientras ayera sindicatonan a duna informacion di varios ora di walk-out na diferente departamento y companianan publico y semi-publico.
