Sindicatonan SPA y SIMAR ainda kier protesta, no pa “cuanto” ta wordo corta di salario, pero pa “con” e 5% ta wordo corta pasobra e ta afecta nan pensioen. Gobierno a splica cu e cortamento di 5% riba salario di empleadonan publico, tin un efecto di 4 florin riba nan pensioen den futuro y pa maestronan e ta 4.50 pa luna riba nan pensioen.
“Gobierno a tene cuenta cu por tin malcontento y protesta awor cu Aruba ta den crisis, pero a pensa cu mas bien esaki lo a bin di esnan cu a perde 40%, 60% of 100% di nan entrada, y no di esnan cu a perde 5%! Gobierno ta lamenta esaki, principalmente pasobra e discusion no ta e “cuanto”, sino e “con”. Pero esaki no ta hustifica cu ta pone orden publico na riesgo of ta stroba nos muchanan di haya les. E accionnan aki NO ta hustifica”, segun Prome Minister Evelyn Wever-Croes den conferencia di prensa di Gobierno di Aruba dialuna mainta.
2011 y 2014
Na 2011 y 2014 sindicatonan a bay di acuerdo pa corta severamente den pensioen di empleadonan publico, sin a consulta debidamente cu nan. Hopi di nan no tabata sa mes, y apenas awor ta haya sa.
E tempo ey a bay di acuerdo cu franchise y a hisa e edad di pensioen. Bo sa cuanto e empleado publico a perde na 2011 y 2014? 24 mil florin pa aña, cada aña, cu ta 2000 florin pa luna! Bo sa cuanto e empleado publico ta perde cu e cambio di 5% na 2020? 44 florin pa aña, cu ta 4 florin pa luna!
Bo a wak sindicatonan protesta na 2011 y 2014? NO! Nan a hasta celebra cu e gobierno anterior.
Mas tristo ta, awor tin un pandemia mundial, y ta pidi nan entrega 4 florin pa luna di nan pensioen. Na 2011 y 2014 no tabata tin pandemia ni crisis, tabata tin bonanza y malgastamento di placa. E tempo ey sindicato a bay di acuerdo.
Ta bon pa miembronan di sindicato exigi splicacion di nan sindicato pakico awor si, awor cu mundo ta den un pandemia, mester protesta, y e tempo ey no.
