Capital di Paraguay, Asuncion, lo permanece cera durante Pasco Grandi, asina ta keda prohibi e entrada y salida di persona- y autonan, pa via di e medidanan adopta pa combati e pandemia di coronavirus, segun Ministerio di Interior Paraguayo a informa.
“Lo haya control estricto di circulacion di personanan y vehiculo durante Pasco Grandi, asina lo keda prohibi totalmente entrada y salida pa Asuncion, interior di pais y otro camindanan” e nota oficial ta bisa.
Ademas, Ministerio di Interior a pidI e ciudadanonan pa cumpli cu e cuarentena nacional y di 24 ora cu ta regarda e nacion sur Americano desde 21 di maart ultimo y por lo menos te cu 12 di april.
Minister di Interior, Euclides Acevedo, ya a pidi caba pa e Paraguayonan cancela nan biahenan di Pasco Grandi. “Tin cu pidi hende pa no bay interior di e pais. Na e momentonan aki no, por fabor”, dialuna ultimo el a bisa.
Ademas, e titula di Interior a denuncia cu e cantidad di personanan deteni pa viola e cuarentena durante e fin di siman ultimo a aumenta. “Nos lo bay ta mas estricto”, el a avisa.
Paraguay cu tres morto y 65 caso confirma, a adopta medidanan drastico, como cuarentena nacional of ceramento di frontera, pa combati coronavirus. E pais a supera caba e ultimo malesa di dengue, cu a laga 53 morto y 177.104 caso confirma.
E presidente Paraguayo, Mario Abdo Benitez diasabra ultimo a anuncia un extension di aislamento total te cu 12 di april, como parti di e medidanan excepcional pa contene e avance di COVID-19.
