Camara di Comercio di Aruba (KvK) pa medio di su presidente, Ernst Mohamed ta expresa su palabra di felicitacion na e gobierno nobo di Aruba cu a keda huramenta recientemente dilanti gobernador di nos pais. Antes di duna un relato di tur acontecimento y logro di KvK durante e di dos mita di 2017, sr. Mohamed a bisa: “Nos ta desea gabinete Wever-Croes hopi exito y bendicion den e proximo temporada di gobernacion”.

Como gremio comercial nan ta consciente cu e gabinete Wever-Croes tin hopi reto pero tambe hopi oportunidad nan dilanti. Sr. Mohamed a resalta e echo cu pa prome biaha den historia di pais Aruba nos tin un ser femenino como prome minister. “Mi ta contento cu mi ta akinan para como presidente di Camara di Comercio cu a pasa cu Aruba tin su prome minister femenino”, el a bisa.

Segun presidente di KvK, e acontecimento politico aki ta mustra mundo cu na Aruba tambe nos ta progresa y nos ta creando oportunidad igual pa tur hende di nos comunidad. “Nos tin un gabinete crea pa medio di tres partido cu a cera un acuerdo di formacion”. E ta haya cu den e forma di coalicion aki nan kier brinda pueblo di Aruba un gobierno transparente y KvK ta elogia esaki.

Puntonan di atencion
Tambe presidente di KvK a agrega cu e gremio comercial aki lo sigui duna di su banda y nan lo continua di mantene e lasonan cu e diferente departamento gubernamental. E ta haya cu asina hunto nan por logra tur e metanan comercial poni nan dilanti.

KvK a analisa e plan di gobernacion cu e tres partido di coalicion (MEP-POR-RED) a traha pa ehecuta nan. Igualmente nan cu KvK como gremio comercial a concentra riba nan lista di deseo of puntonan di atencion pa nan wordo atendi debidamente.

E puntonan aki segun presidente di KvK nan a compila nan durante tur e combersacion cu nan a sostene como gremio comercial cu tur e partidonan . “Nos a bay di acuerdo cu esey. Nan ta retonan cu nos tin cu soluciona”, el a bisa.

KvK ta percura pa haci un siguimento pa e puntonan por wordo atendi durante e gobernacion actual cu a caba di sinta. “E no ta algo di nos so, pero e ta algo conhuntamente. Nan no por bisa cu ta camber so, e ta algo di nos tur”. El a laga sa cu e puntonan aki cu KvK a bin cu ne a wordo treci dilanti durante e reunionnan cu nan a sostene cu diferente instancia y partidonan.

Den tur e reunionnan aki tin aspectonan manera red tape cu nan mester traha riba dje. Tambe durante e reunion cu nan tabatin cu gobernador di Aruba den nan sala di conferencia di KvK, nan a papia di tur e retonan y cu nan kier atende cu nan.

E ta haya cu tur hende a bay di acuerdo cu red tape , e-commerce, enseñansa, criminalidad, salubridad y asunto social ta puntonan clave di nos comunidad . E ta haya cu nan tur tin un efecto riba comercio, ya cu pa ehempel e tin cu manda un trahado afo, e tin cu busca otro hende, y e ta bay pisa riba nan negoshi. E peso aki ta bay pasa finalmente riba e consumido