Presidente di ATIA, Roland van Trigt ta kere cu semper e reto di un gobierno nobo ta grandi. “Goberna no ta un arte facil”, el a declara na Bon Dia Aruba.

Na prome luga el a recorda cu diabierna ultimo nos a celebra democracia. Pero na mesun momento como gremio nan ta para keto tambe riba kico e resultado di eleccion aki ta. Mester tene cuenta riba kico e resultado aki ta, pasobra e ta uno di pueblo, ya cu pueblo ta scoge locual Parlamento ta bay bira.

Segun presidente di ATIA, prome cu nos sigui bay dilanti pa haci cualkier plan di gobernacion, nos mester tin un gobierno cu despues cu ta wordo forma como mayoria den parlamento, nan por duna e mensahe bon cla cu e ta un gobierno pa henter e pais, pa henter nos pueblo.

E ta haya cu esaki ta e punto di salida pa eynan pa dilanti nos por forma tur sorto di cosnan grandi pa Aruba.

Retonan
E presidente di ATIA ta haya cu e siguiente gobierno cu bay sinta tin retonan special cu ne. Un aspecto tin di haber cu e relacion cu Hulanda segun sr. van Trigt.

Un otro reto ta e modo cu nos tin cu atende cu nos debe publico y finansa; con nos tin cu maneha esaki y yega na e punto importante cu a wordo estableci den reino. Tambe e relacion cu Caft y con e ta bay continua ta otro aspecto cu e gobierno nobo mester atende cu ne.

E ta haya cu con cu bay bin, e ta bay ta un gobierno cu tin un tarea hopi importante di sigui sanea e situacion financiero di nos pais. Pa comercio como gremio nan ta spera un impulso di incentivonan pa nos economia por ta un economia activo. “Haci economia di nos uno mas accesibel, mas eficiente y mas productivo pa asina mas hende por participa den dje”, el a declara na Bon Dia Aruba.

Gobierno di inclusion
El a vocifera cu esakinan ta puntonan cu ATIA como gremio comercial semper a bin cu ne y cu nan ta spera cu e proximo gobierno tambe lo tin atencion pa e proceso aki.

E mester ta un gobierno di inclusion, pues cu ta inclui tur hende. Comercio mester tin espacio pa duna nan opinion y vision di kico ta e miho pa nos economia. Como gremio nan por duna nan aporte riba e direccion cu nos pais mester bay, segun sr. van Trigt ta splica.

Sr. van Trigt a bisa cu diabierna ultimo Aruba su pueblo tabatin un privilegio cu hopi pais no tin. “Na Aruba nos tin e privilegio di biba den un sociedad democratico unda nos tur anonimamente por deposita nos voto”. Di e forma aki nos pueblo ta yuda determina ken ta bay representa nos den parlamento pa e proximo gobierno cu ta bin.

E ta haya cu semper pa e gremio comercial, realisacion di eleccion ta un momento importante y p’esey nan ta sigui e proceso aki di cerca, ya cu cada partido cu ta bin, tin su programa.