Parlamentario Chris Romero (MEP) a tuma nota via diferente medionan di comunicacion y social media di minister demisionario encarga cu transporte, Mike de Meza a kibra un moratorio di permiso di taxi cu ta data di 3 di juli 2015.
Segun parlamentario Romero, e moratorio aki tabata vigente, pero 27 di september, kiermen 5 dia despues di eleccion, e decision aki a wordo cambia. Te hasta tin permiso cu a wordo pidi caba. Ta wordo papia di 50 permiso duna y ya tin hende cu a cuminsa cu nan tramite. Pero e no ta duda cu ora nan ta drenta oficialmente den maneho di gobierno nan lo haya mas informacion mas cla riba esaki.
E ta haya cu e kibramento di e moratorio aki tin su impacto. Ya cu e ta habri e porta pa aumenta e cantidad di 450 taxi pa 500, kiermen 50 mas acerca. E cambio aki segun sr. Romero a sosode sin por a haci prome estudio necesario of a lo menos bin cu argumentonan.
El a laga sa cu e gremio di taxista mes ta pasando den dificultad. Nan tin cu core oranan extra pa asina nan por produci algo pa nan por sobrevivi di dje. “Esaki ta un acto hopi iresponsabel.” Ya cu unabes cu nan ta sinta como gobierno nan ta bay honra e moratorio bieu cu ta existi 2 aña pasa. E acto ilegal aki segun e parlamentario y futuro minister ta perhudica no solamente e taxistanan pero tambe e minister entrante cu ta bay ta encarga. Ya cu e mandatario nobo aki lo mester carga cu e problema djis pa acomoda cierto coordinador.
Bon Dia Aruba a papia cu un taxista cu tin basta aña coriendo taxi. El a expresa su disgusto cu e decision di e gobierno saliente ya cu ta dificil pa nan por gana nan pan cu e ofishi aki. El a bisa cu e trabou aki ta hopi sacrificio ya cu e no tabata como antes cu e bolo tabata yega pa nan tur. Awor e generacion nobo di taxista tin biaha ta sacrifica te hasta nan famia trahando fei di mainta tempran te anochi laat pa logra a lo menos algo pa cumpli cu nan compromiso.
Nombramento
Tambe el a cualifica como un echo ilegal y iresponsabel e nombramento di hendenan den aparato gubernamental di parti di e gobierno saliente. E mesun denuncia aki a wordo haci caba pa algun di su coleganan caminda nombramento den aparato gubernamental ta tumando luga di coordinadonan y personanan cu tabata na servicio di e gobierno anterior.
“Nan ta nombrando ex coordinadornan, ex sostenedonan, pero tambe ex conseheronan den diferente departamentonan,” el a bisa. Aunke nan no ta contra di ningun di e nombramento aki, pero e ta haya un lastima cu tin e posibilidad grandi cu e nombramento nan aki realisa pa e gobierno demisionario no ta wordo honra. Te hasta sr. Romero a indica cu parce cu algun di nan hasta a sosode despues di eleccion ora cu tur hende tabata sa di e resultado di dje.
Tambe el a informa cu e gobierno di coalicion ta bay pone un stop definitivo riba e fenomeno aki cu generalmente ta bin tumando luga cada bes cu tin un cambio di gobierno pa otro di diferente signatura. P’esey e punto aki nan a inclui den nan programa di gobierno pa esaki no sigui sosode mas den futuro.
