Gobierno nobo lo inventarisa tur toezegging y otorgamento di tereno duna durante gobierno demisionario

Dos dia prome cu Minister actual di Turismo, Dangui Oduber a huramenta, el a expresa su preocupacion pa e decisionnan cu gobierno saliente den su condicion di demisionario a tuma prome cu nan a baha.

El a bisa cu un tipo di “fiesta” a tuma luga unda no solamente nan a firma permiso pa core taxi y auto bus, sino cu a bin cu diferente toezegging cu ex minister Benny Seviger a duna encuanto desaroyonan di industria turistico. Tambe otorgamento di tereno cu nan ta bay haci un inventarisacion

E hoben mandatario a bisa cu esaki ta un forma cu e gobierno saliente a sigui compromete e gobierno nobo cu a huramenta diabierna ultimo. Nan ta decisionnan cu el a bisa claramente cu nan no ta di acuerdo cu nan.

El a declara cu ex mandatario Sevinger a bay di acuerdo pa e hotel Holiday Inn converti su mes den un hotel all inclusive. Actualmente minister di Turismo a trece dilanti henter e discusion cua tuma luga rond di e tema aki di all inclusive, tempo cu su actual colega di gabinete tabata minister di Turismo den e gobernacion ultimo.

E mandatario nobo di Turismo a bisa cu e tempo aya nan fraccion di oposicion a presenta un amienda caminda nan no kier mira mas ampliacion di camber all inclusive. Pero e ta haya cu apesar di esaki y cu e ley aki a keda aproba, ex minister Sevinger como minister demisionario a bay di acuerdo cu e situacion aki. E ta lamenta esaki profundamente ya cu como minister demisionario of gobierno demisionario bo mester atende solamente lopende zaak. “Pero aparentemente tur decision cu nan tuma a bira lopende zaak”, el a bisa.

E decision di duna oke pa bin cu mas camber all inclusive den Holiday Inn ta muestra cu nan no ta tene cuenta cu e pueblo y apesar di esaki e ex mandatario a bay di acuerdo cu mas ampliacion di all inclusive. Pero no solamente cu esaki sino cu ex mandatario tambe a bay di acuerdo pa bin cu un proyecto hotelero na Bubali, y cu tabatin basta discusion rond di dje. “Kiermen mas camber di hotel atrobe”, el a bisa.

Banda di esey na Ritz Carlton, minister di Turismo sr. Oduber a laga sa cu nan a compronde cu ex minister Sevinger a duna toezegging pa 30 camber ta wordo bendi estilo camber condominio. El a expresa su preocupacion riba e decision aki ya cu e ta haya cu enbes cu nos ta eleva nos producto turistico, e gobierno demisionario cu a caba di baha ta degrada nos turismo. El a reitera cu e gobierno nobo no ta di acuerdo cu tur e decisionnan aki cu a wordo tuma ora cu e gobierno anterior tabata demisionario.

E tipo di decision aki –segun mandatario Oduber- ta contra di tur regla di bon gobernacion. “Nos a bisa den pasado cu den e momento aki Aruba no mester di mas camber all inclusive”, el a declara. Nan kier wak desaroyo den tereno di turismo cu ta eleva nos producto of ‘upgrade bo producto’.

Nan ta compronde cu tin mas toezegging cu a wordo duna durante ultimo dianan di e gobierno demisionario Mike Eman II. Tambe riba otorgamento di tereno locual e ta haya cu di e forma aki nan ta compromete e gobierno nobo cu decisionnan cu no ta cuadra cu nan vision. Ya caba el a indica cu nan lo haci un inventarisacion di tur e toezegging y tereno otorga pa wak den cual direccion nan ta bay.