Parlamentario y minister potencial di e proximo gobierno di coalicion (MEP-POR- RED), Dangui Oduber (MEP) a bisa cu na momento cu bo tin un gobierno nobo, bo tin otro vision. El a referi na e bashamento di ex Bushiri hotel y e destinacion di gran parti di e area aki pa un beach publico. Pero tambe el a laga sa cu na e momento aki nan no ta na haltura kico ta e contenido final di e master plan di e proyecto di desaroyo di e area di waf na Oranjestad. Pero e master plan aki sigur lo wordo evalua.
E area di ex waf di crucero y ex Bushiri hotel ta forma parti di un macro proyecto di cual APA a presenta un master plan di dje. E master plan aki no a wordo firma of oficialisa ainda. Sr. Oduber ta considera cu mester hisa e calidad di nos turista kiermen e turista ta gasta. E ta un punto cu ta forma parti di nan programa di gobernacion y nan lo pone debido atencion na dje.
Master plan di APA
El a referi na e master plan presenta pa APA y e parti di e infrastructura di waf cu tabata destina un parti pa barco crucero y otro parti tabata wordo destina pa e waf di e barco di container. Den e master plan aki ta wordo condena un parti importante di e ex waf di crucero pa un desaroyo nobo riba henter area aki.
Sr. Oduber a bisa cu e master plan aki a wordo discuti durante e ultimo añanan aki. E mes a forma parti di e comision di infrastructura y den un ocasion e comision aki a haya un presentacion di e director di APA y tambe di e manager team cu tabata encarga cu e master plan aki. E presentacion aki tabata uno inicial y nan tabata di bin pa realisa un siguiente presentacion den e fase final riba kico lo bira e master plan “pero e presentacion aki nunca mas a tuma luga.”
Na e momento actual nan mes como miembro di parlamento no ta na haltura kico ta e contenido precies di e master plan aki. Pero nan a anuncia caba cu e master plan aki lo wordo evalua mescos cu ta conta pa e caso di ex Bushiri hotel .
“Mescos ta conta pa e master plan aki cu no necesariamente nos ta di acuerdo cu e master plan cu lo wordo presenta nan nos,” segun parlamentario Dangui Oduber.
El a reitera cu nan mes no ta na haltura di e master plan di APA. Den e gobierno nobo cu lo bay sinta nan prome paso riba e asunto aki ta pa nan haya un presentacion di e master plan aki y despues di esaki nan lo haci un evaluacion si nan ta di acuerdo of no. Den caso cu nan no ta di acuerdo mester diseña un master plan nobo pa henter e area aki di waf di Oranjestad, ya cu na final –segun sr. Oduber- tin un gobierno nobo cu un vision diferente na esun saliente. Nan mester haya prome un presentacion, ya cu entre otro tin hopi discusion si nan ta mishi cu e waf of si nan ta bay amplia esaki. Te hasta si nan ta bin cu condominio of hotel den e area aki.
Riba e punto aki el a laga sa cu informalmente el a haya informacion cu esey ta e caso di e master plan aki. “Cu nan kier haci un combinacion di un linear park cu algun condominio y algun hotel”, el a bisa. Tambe cu nan kier laga e area habri cu bista full habri riba lama. Pero concretamente nan no sa kico ta e contenido. P’esey e ta haya importante como gobierno nobo cu nan por haya un presentacion prome antes cu nan ta tuma un decision kico ta bay ta e destinacion di un area sumamente bunita y grandi di 30 mil meter cuadra.
Ex Bushiri hotel
E ta haya cu e proyecto di e loke nan kier haci riba e area importante aki no tabata forma parti di e vision di MEP sino di e gobierno saliente. “Tin un signatura nobo cu ta di MEP, POR y RED. Y nos a anuncia durante temporada di campaña caba cu e plan ta pa bin un boutique hotel caminda Bushiri hotel ta”, el a bisa.
Tambe el a laga sa cu entre ex Bushiri hotel y Tamarijn lo wordo destina pa un beach publico pa comunidad por haci uzo di dje. E no ta kere cu e plan di nan no ta mucho diferente na esun prome di e gabinete anterior. El a laga sa cu gobierno anterior di partido AVP tabatin den nan plan inicial tambe pa bin cu un sport hotel na Bushiri y e otro parti banda di dje pa un beach publico.
