Tin buraconan pa tapa awo den Aruba Tourism Authority (ATA) y AZV unda cu awo gobierno nobo a hereda algun miyones adicional di debe. Esaki minister di Turismo, Salubridad y Deporte Dangui Oduber (MEP) a trece dilanti ayera.

Ayera tabata tin e prome conferencia di prensa oficial di ministerio di Turismo, Salubridad Publico y Deporte. Minister Oduber pues a elabora kico e ministerio ta haciendo e ultimo tres siman di gobierno. Nan ta inventarisando ainda y manera ta conoci nan no a haya un traspaso manera debe ser segun minister Oduber. E ta laga sa cu logicamente tin e programa di gobernacion cu ta canando y maneho tambe di ministerio di Turismo, Salubridad y Deporte riba kico lo haci pa cada tereno. E mandatario ta bisa cu pa otro siman caba nan lo bin cu algun anuncio grandi pa loke ta trata Salubridad Publico. Pero ayera e kier a para keto riba iregularidad cu nan a topa recientemente. “E ta un lastima y mi ta kere cu ta cosnan cu tin cu wordo bisa pa comunidad sa e grado di iresponsabilidad di e gobernantenan anterior,” minister Oduber a comenta.

ATA: ‘Problema cu cash flow’
Pa loke ta trata Aruba Tourism Authority (ATA), ministerio a tene caba basta reunion cu nan y haya algun presentacion. Na momento cu e oficina di turismo a wordo funda como sui generis, ley ta stipula cu dia 15 di cada luna gobierno mester traspasa e impuesto riba camber cu hotelnan ta cobra turistanan (room tax). E suma di placa aki mester bay pa ATA pasobra esaki ta e entrada mas grandi cu e autoridad di turismo ta ricibi. Basa riba e entrada aki ATA ta paga su gastonan operacional y mercadeo. “Pa prome biaha den historia na momentonan aki ATA tin problema cu cash flow. Imagina bo cu nan semper a wordo categorisa manera un instituto cu semper tin placa, na momentonan aki nan tin problema serio.” Minister Oduber a sigui bisa cu e gobierno anterior pa cinco luna caba no a traspasa e placa aki. Na momentonan aki Pais Aruba debe ATA 22 miyon florin, segun e mandatario.

“Gabinete Mike Eman II a keda cu e placa, nombra coordinador y uza placa di ATA pa otro destinacionnan. Cu pensamentonan cu nan lo gana eleccion pero awe nos tin un otro gobierno cu ta hereda esaki. Y ta lamentabel pasobra e deficit financiero ta mas cu 130 miyon y ainda bo ta bin haya bo cu e tipo di sorpresa nan aki.” Segun e mandatario, ATA a laga sa cu si nan no haya e placa den e proximo dos simannan aki, aña lo habri pa ATA pa prome bes den su historia den cifranan negativo.

Gobierno debe AZV 46 miyon
E situacion di AZV no ta mucho diferente segun minister Oduber. E ministerio a ricibi un carta for di director di AZV unda nan a subraya riba un situacion identico na ATA. “Cu pa motibo di iresponsabilidad (di gobierno anterior) no ta traspasa tur e primanan di BAZV cu ta wordo paga pa aseguradonan y bay den caha di gobierno. Esaki automaticamente mester wordo traspasa pa AZV pa nan por hiba nan maneho y cubri gastonan medico. Mesun caso, pa cuater of cinco luna Azv no ta ricibi su placa,” e mandatario a trece dilanti.

Gobierno na momentonan aki debe AZV46 miyon florin. Ora cu pone ambos e departamentonan hunto cu ta cay bao di e ministerio di minister Oduber, ta papiando cu Aruba tin un debe adicional di casi 70 miyon florin awo.

E carta di director di AZV ta declara cu na momentonan aki AZV no tin placa pa paga por ehempel hospital. “Con mas iresponsabel bo por ta como gobierno saliente di laga un situacion asina ki pa e proximo gobierno. Si nan mes lo a gana eleccion, nan mes lo a hereda e situacion aki. Mi ta haya esaki sumamente iresponsabel pa goberna un pais na e manera aki.”

Minister Oduber ta bisa cu posiblemente lo mester bay fia placa atrobe pa cumpli cu e iresponsabilidadnan aki cu e gobierno anterior a laga atras pa nan segun el a expresa ayera. “En todo caso e gobierno aki t’ey pa tuma accion.”

E mandatario ta bisa cu tin hopi reto nan dilanti y esakinan mes ta retonan financiero caminda cu tin cu busca awo manera con pa tapa buraco pa ATA y AZV. Pa asina hospital por keda brinda servicio y manda pashentnan den exterior cu mester e cuido medico necesario, y pa tambe evita cu ATA bay den cora. Na momento cu e oficina di turismo bay den cifranan cora, nos ta core e riesgo cu Ata no tin placa pa inverti den por ehempel mercadeo. Esaki ta bira despues dificil pa atrae e turistanan cu bo kier atrae pa bin bo pais, segun e mandatario.