Den e dialogo tripartite social laboral (D.T.S.L) no tin asunto no negoshabel di parti di gobierno, asina minister di labor Glenbert Croes a declara na Bon Dia Aruba. “No! E idea ta pa yega na entendimento cu otro. E berdad ta cu gobierno no por goberna di un forma unilateral,” el a expresa na e matutino aki.
No tin niun tema bou veto. Nan meta ta di purba di convence otro den tema cu por resulta dificil, pero cu proposito ‘genuino y sincero’. E ta haya cu edad di pension lo bira un discusion unda cu tin diferente scenarionan cu mester wordo analisa.
Croes e bisa cu minister presidente ta esun encarga di parti di gobierno cu e proceso aki, caminda lo tin diferente opcion poni ariba mesa. Pero tur loke ta resulta di e dialogo aki ta producto di un entendimento entre e tres partinan: gobierno, dunado di trabou y sindicato.
Ayera e forma con e delegadonan a wordo ubica den e congreso aki tabatin e forma di ‘U’. E mandatario a bisa cu esaki ta un forma simbolico cu mester representa pa yega den un union y entendimento riba temanan di interes nacional.
Dialogo tripartite
Segun e mandatario, tur loke ta wordo produci a base di entendimento den e dialogo aki lo wordo respeta door di gobierno di Aruba. Despues, loke tin di haber cu e parti legislativo lo wordo poni na consideracion di parlamento di Aruba. E minister a bisa cu loke nan kier ta logra un base amplio pa tema di interes nacional cu ta afecta cada ciudadano di nos pais.
Tin un agenda reestableci a base di e trabou di ocho luna realisa pa e comision tecnico. Tambe tabatin un pre- congreso na december. Den e fase aki di e congreso, cada delegado permanente lo presenta nan puntonan di agenda, y tambe gobierno lo presenta esun di nan. Nan lo cuminsa e dialogo cu entre cuater pa cinco tema. Pero asina cu e temanan ta bay plenario, e por bira mas. Pero nan tin un agenda cu temanan di prioridad, entre nan e ley di Arbo.
Un esfuerso grandi a wordo haci pa gobierno congrega e gremionan di dunado di trabou y gremio sindical pa traha conhuntamente temanan di interes general. E ta haya cu esaki ta un proceso di un gobernacion inclusivo y participativo.
Tema di gobierno
Croes a declara na e matutino aki cu e meta di parti di gobierno, of puntonan di prioridad tras di e tripartite aki, ta e ley di Arbo of di siguridad, salud y bienestar na pia di trabou. Otro temanan di prioridad tin di haber cu stipulacion di salario minimo, edad di pension, uitzendbureau, y tambe un reevaluacion total di e ley laboral na Aruba. El a cualifica e uitzendbureau como un practica di abuso y maltrato, y violacion di derecho di trahadonan.
Igualmente, el a señala cu cada gremio lo bin cu su diferente puntonan, y hunto nan lo stipula un agenda di trabou. Aunke esaki ta nan prome congreso, e mandatario ta spera cu e plataforma aki lo bira un mecanismo di consulta permanente entre tur e gremionan na Aruba. Tambe ora cu ta trata di asunto cu diferente ministerio mester atende cu nan, e minister concerni lo ta na mesa hunto cu su persona pa atende e tema aki den e plataforma tripartite aki.
E ta spera cu nan ta creando un mecanismo di consulta permanente pa duna un participacion berdadero di consulta, discusion y debate. Pero tambe e meta ta –segun minister Glenbert Croes- cu nan por yega na otro.
