Siman pasa, apesar cu gobierno a laga sa cu aprobacion no tabata conveniente, Congreso di Colombia a pasa cuatro ley di cual e implementacion ta costa biyones di peso, cu simplemente no ta existi den presupuesto nacional. Ekiponan huridico di gobierno ta busca pa recolecta e argumentonan legal pa haci obhecion contra e aprobacion.
Dos di e leynan ta trata tema social cu a capta bastante atencion. Uno ta e reduccion di e cantidad di siman cu hende muhe riba 57 aña, y cu ta gana te dos biaha salario minimo, mester cumpli cu pago di prima di pension, pa por tin derecho riba esaki. E cantidad awor a bira 1150 siman envez di 1300. E otro ta e reduccion di e 12% pa 4% di e aporte di pensionado na gasto di salud.
Segun ministro di Finanzas, Mauricio Cárdenas, e prome medida ta costa 2 triyon (2.000.000.000.000) di peso (US$ 660 miyon) pa aña, y e otro di aporte na salud lo costa 3 triyon di peso (US$ 1.000 miyon). E ministro ta considera cu esaki ta bay contra e asina yama regla fiscal, cu cualkier ley aproba mester tin consulta di antemano encuanto e realidad di presupuesto.
E otro dos leynan cu tin tambe un impacto fiscal grandi segun Cárdenas, ta esun cu ta aproba incorporacion di tratamento di fertilisacion na e pakete di salud y di ampliacion di e examen neonatal. E fertilisacion segun fuente externo por costa te 100 miyon peso (US$ 33.000 ) pa caso. Pa e examen amplia riba tur recien naci pa detecta eventual enfermedad straño no a duna un costo.
Ministerio di Finanzas no a revela e costo fiscal di e dos leynan aki, pero a laga sa cu no tin recurso financiero pa implementa nan. E leynan a keda aproba den cuatro debate, no obstante e advertencianan di banda di gobierno cu no tin e recursonan financiero pa cumpli. E mandatario a bisa cu ta trata di “leynan populista” cu apesar di e bon intencionnan, no lo beneficia e Colombianonan, si no tin placa pa implementa nan.
