Secretario Hulandes si a pone fecha final di 30 april

Riba e posibilidad di un aanwijzing (KB), prome minister Evelyn Wever-Croes (MEP) a bisa cu su gobierno ‘no tin notificacion di un KB for di Hulanda’. Sinembargo tin un carta di gobierno Hulandes pa conseho di ministernan pa bin cu e KB cu aanwijzing si Aruba no ta cumpli financieramente pa fin di april.

Aunke ta existi motibonan, e no ta kere cu den e circunstancia actual, gobierno di Hulanda ta bay manda un KB. Specialmente awor cu su gobierno ta den negociacion cu Hulanda pa atende e problema financiero di pais Aruba. Minister di Financia, Xiomara Ruiz- Maduro (MEP) ta biahando pa atende un reunion na Hulanda y presenta e plan financiero di gobierno pa atende cu e crisis aki di financia publico.

Esaki e prome minister a bisa ayera, pues prome cu e reunion di conseho di ministernan di Reino a tuma luga awe. Prome cu e reunion aki a tuma luga, secretario di estado Hulandes y encarga cu asuntonan di Reino, esta Raymond Knops, a informa cu gobierno di Aruba lo haya te 30 di april pa presenta un presupuesto cu ta cumpli cu e normanan di Caft (supervision financiero). Si no un aanwijzing (den forma di Koninklijk Besluit, KB) lo sigui.

Esaki e secretario a informa den un carta pa e conseho di ministernan di Reino. Unda e ta mustra tambe cu Aruba a presenta un presupuesto pa 2018 cu un deficit di 3,9% sin tene cuenta cu e obligacion pa compensa e deficit di 2017. E debe lo subi e aña pa 91% GDP.

El a laga sa cu e comunicado cu gobierno a divulga riba e asunto aki di un KB no mester wordo interpreta como un anuncio di anticipacion di KB. Aunke e ta haya cu evaluando e situacion y e falta di cumplimento di e gobierno anterior riba e ley di rescate financiero supervisa pa Caft, tin mas cu un motibo pa bin cu tres KB.

“Cu tin hustificacion pa un KB, definitivamente. Pero esaki ta e realidad cu nos a hereda di nan.”

E prome mandatario a abstene di duna detaye riba nan plan di maneho financiero te na su debido tempo. E no ta haya prudente aworaki pa anuncia. “Pero unabes cu nos ta cla, nos ta haci anuncio.” Nan ta finalisando e plan aki y mirando cu celebracion nacional di Himno y Bandera ta na porta y considerando cu minister di Financia ta biahando dialuna awor pa Hulanda, e ta kere cu otro siman nan lo sigui atende cu e tema aki. Pues otro siman -segun e prome mandatario- nan lo bay presenta kico ta e plan, te unda nan ta bay y kico ta locual nan mester introduci pa pone ‘ordo bek’.

Situacion financiero
E kier evita di perde credibilidad si mester bin cambio na caminda riba e plan aki, ya cu e ta sinti cu su gobierno ta gosa di confiansa y credibilidad. Gobierno ta hopi cauteloso riba e plan aki, locual a crea speculacion y mal informacion tocante su contenido, entre nan riba un posibel aumento di BBO.

El a bisa cu durante un entrevista radial diaranson ultimo, e periodista a formula un pregunta inespera. El a reitera cu pa loke e sa no tin niun KB na caminda. E no a haya niun notificacion di dje, pero e no ta descarta cu tin motibo pa KB. Mientras cu el a tilda di e noticia falso, e no ta para responsabel pa tur informacion cu un website di noticia ta trece, e mandatario ta referi specificamente na e website di 24ora.com. E ta compronde cu tin hopi ansha pa sa kico ta bin. “Presionnan, specula, anshamento, puramento no ta yuda nos.”

El a referi un biaha mas na e situacion financiero ‘desastroso’ cu nan a hereda di e gobierno anterior y tambe na falta di cumplimento di gabinete Mike Eman II na e ley di Caft. Mirando cu e gobierno anterior no a cumpli cu entrega di presupuesto dia 1 di september ultimo. Tampoco dia 15 di december no por a aproba presupuesto 2018, ya cu e gobierno actual apenas tabatin un luna na mando. Igualmente nan no a cumpli cu e deficit stipula bou e ley supervisa pa Caft. Pa tal motibo e ta haya cu tabatin motibo di sobra pa bin no cu un KB, sino cu tres pa e gobierno anterior.

E ta spera cu nunca lo bin un KB, pero mirando e ley di Laft (Landsverordening Aruba financieel toezicht), e prome momento cu un KB por bin, ta despues cu e presupuesto pasa cu si e no ta ahusta na e palabracion haci cu Caft.

E meta ta cu e presupuesto 2018 lo wordo trata na luna di april pa e ta cla, eventualmente pa fin di e luna aki. “Si e presupuesto no ta cumpli cu e normanan, anto e ora por bal di pensa cu e procedura di un KB ta wordo inicia.”